【報紙】王伯昭告埋公安局

日期: 2004年11月13日
來源: 蘋果日報

王伯昭告埋公安局

早排張衛健同謝霆鋒拍劇集《小魚兒與花無缺》涉嫌打傷內地演員王伯昭，之後佢兩個去醫院探王伯昭兼向佢道歉，但王伯昭條氣重未順番，唔單止決定告張衛健同謝霆鋒，重告埋內地公安局，點都唔肯罷休。

張衛健（左）同謝霆鋒（右）早前去北京醫院探望受傷的王伯昭。

張衛健（右）前晚抽空出席李彩樺生日派對，似乎冇受王伯昭件事影響心情。

不服「劇情需要」裁決

王伯昭認為張衛健同謝霆鋒係假戲真打，故意打佢，件事初時交左畀公安局懷柔分局轄下楊宋派出所調查，楊宋派出所認為張、謝兩人冇故意傷害佢，只係拍攝過程中有行為上過失，認定兩人「沒有違法事實」，十月十八號作出決定唔受理件事。王伯昭唔服派出所決定，於是向巿公安局懷柔分局提出行政複議，但懷柔分局認為張、謝打佢係屬於「劇情需要」，同樣冇故意傷害王伯昭，所以維持楊宋派出所做既決定。

王伯昭認為派出所冇去現場調查清楚，係違反法定程序，所以佢決定連巿公安局懷柔分局都告埋，懷柔法院已經正式受理王伯昭事件，件事再搞落去，真係唔知幾時先搞得完。