【網絡】淺談亞視失敗之因

日期: 2007年5月17日
來源: 糸色望的長恨歌

永遠二奶台? 淺談亞視失敗之因

話說今日返工做野個時, 見到一個亞視成日見的甘草演員, 口痕問下佢係唔係去開戲, 就伸展到呢個問題啦......... 雖則只係吹左2, 3分鐘, 但已經講左唔少一直以來我想講的野同埋深化埋一些我本身無的論點了........

其實亞視長久以來, 雖然被無線壓制, 但仍不會被人無視, 在邱德根同林百欣年代, 都有過唔少擊敗無線的記錄, 但在封小平入主後, 亞視政策為之一變, 同時開始走向不歸之路..........

封小平行的政策是不再自家拍劇, 改用外購劇。其理由是外購劇的質素不錯, 而且買入價錢較自家拍劇的成本低....... 聽落好似真係可以止蝕不得止, 仲可以提升節目質素....... 理論上係的...... 而且政策實行不久後, 亞視就借外購劇打贏一場前所未有的勝仗!

無錯!還記得還珠格格嗎? 當年此劇一出,無 線立即潰不成軍, 被亞視取得20多點收視。要知道當時亞視的收視長久以來都是單位數 (7-9點), 有雙位數字收視已經是勝仗, 而20點在亞視史上真係幾隻手指數得出......... 而且當時不單是還珠可以有此收視, 之後時段的少年英雄方世玉收視也過雙位數的! 就小弟的記憶, 當年全班同學有6成係睇亞視的!

這一仗的勝利, 對封小平政策打下絕對的根據, 但其實這只不過是戰術上的勝利, 對亞視的弱勢無太大幫助, 就如今日同演員叔叔吹水時講起, 亞視的老毛病就是不能維持氣勢。在方世玉之後的花木蘭就是一例, 其收視立即跌回個位數..........

而何解不能維持這氣勢呢? 因為好的外購劇難求, 而且更重要的是, 外購劇最需要的是宣傳! 當年還珠大熱其中一個原因就是各主角都落力來港配合宣傳, 但總不能每套外購劇都找主角宣傳吧? 而且你這是亞視, 不是無線! 因為幫助亞視宣傳而得罪無線可是不化算的! 當外購劇沒有宣傳, 就沒有人留意,結果只有死寂, 下套外購劇亦如是, 形成一個惡性循環......

而外購劇政策另一個問題, 就是外購劇的質素難以保證, 而一些好的劇集難求之餘又十分搶手, 以亞視的成本來說, 是難以負擔的。同樣都是還珠,還珠格格第三集就被無線用重金買下了 (雖則收視仆到慘絕人寰) 證明無線在還珠一役後, 都開始留意外購劇, 亞視想買好的外購劇就更難了........ 而更要命的是, 是收費電視台也開始對外購劇搶灘! 藍色生死戀, 流星花園, 我係金三珣這些在亞視播過而且取得不錯收視的外購劇, 全部都是播出前就在有線播過了! 而且現今不但有有線, 更多了一個無線收費電視! 那麼亞視真的可以買到第一手好外購劇嗎?

而且亞視外購劇的風格開始走火入魔, 求的不是精, 而是平! 另外一個問題是走向內地化! 兩個問題結合就是買入內地劇! 不是說買入內地劇有罪, 而是根本不合香港人口味! 一些節目根本見到節目名就沒有興趣....... 例如紅孩兒, 加油! 金順等....... 而節目內地化是為了打入內地市場,但你是一個香港電視台, 所以受到留意, 如果你播的和內地電視台無分別的話, 那內地觀眾為什麼要睇你不可呢?

最致命的, 其實是破壞了亞視自己的風格! 當一個電視台沒有了自家劇集, 就好像沒有了靈魂一樣!電視台最重要的資產是藝員, 而最令給予藝員發揮的地方就是自家劇集! 要講近十年最出名的亞視藝員, 女的有楊恭如, 陳煒, 萬綺雯, 男的有尹天照, 杜汶澤。這些可解知名? 拍劇也! 這些人才是亞視風格所在! 而且當年林百欣亦有講, 拍自家劇, 在賣埠上已經可以補回成本了, 可惜因為封小平的政策錯誤, 令亞視走向不歸路!

亞視自家的劇集和資訊節目一直都是不錯, 不要說人人叫好的我和殭屍有個約會系列以及肥貓正傳系列, 其他不太出名的, 如我來自潮州, 屋企有個肥大佬等也不比無線劇集差, 而資訊節目上, 今日睇真D係經典中的經典, 其影響力至今仍可以在無線的節目上見到! 而百萬富翁更影響了不少遊戲節目!

但是, 不知何時開始, 亞視的節目已經無人理會, 人人都睇無線, 就算無線播的是垃圾, 也都睇個飽........