【報紙】出席梁漢文婚禮

日期: 2008年12月19日
來源: 都市日報

出席梁漢文婚禮

梁漢文(Edmond)與拍拖多年的女友林文慧(Karen)昨天拉埋天窗，於港島香格里拉酒店舉行婚宴，筵開36席。Edmond於下午約一時半獨自乘坐保母車抵達婚宴場地。而一眾「頂酒兄弟」如張衛健(Dicky)、許志安、蘇永康、吳國敬及陳奕迅(Eason)等，亦於下午三時許陸續到達酒店。

新郎哥Edmond率領一班兄弟壓陣，坐定定接受傳媒訪問。Edmond坦言心情緊張又興奮，他說：「好開心！但怕做漏東西。前一晚冇搞單身派對，反而同Karen食飯，知道她呢幾日都瞓得唔好。」是否決定提早「曳曳」呢？他續說：「一齊住埋十幾年，話冇都唔信啦！唔通只係掂手指？」

曾志偉與Dicky負責做司儀，Dicky漏了口風說自己前晚致電梁炳，點知新郎哥同寳寶(即新娘)去做腳底按摩減壓。問Dicky可有金句相贈？他說：「真真假假，成婚真心真意無花無假，自己是過來人，婚後二合為一，要互相配合，我會監察佢，指點佢如何做好老公。」對於倪震、周慧敏宣布婚訊，Dicky指兩人都是他的好友，能夠有完美結局咪好囉！

Eason全程笑容滿面，卻稱比自己結婚時更緊張。問他可會幫梁炳頂酒，Eason說：「我就係最驚呢樣，之前何超儀結婚，我去頂酒，點知過了第一圍，我只飲了一杯紅酒已暈陀陀，今晚都唔知點算。」對於倪震突然發表結婚聲明，Eason笑說：「嘩！今日咩日子呀？咁旺場？睇怕要恭喜埋陳志雲！佢擺齋宴呀嘛！我初出道時，周慧敏有讚過我。」至於吳國敬則表示一定唔會讓新郎哥飲醉，免得他搞到瞓地。

楊千嬅急急從北京趕返港，趕及出席6時的註冊儀式。她表示：「除禮金外，亦準備送一對杯給新人，讓兩人每逢紀念日都可以拿出來飲番杯。我係好易感動的人，見到今日梁炳結婚，我真係好開心，不過結婚不是潮流，我不會貪高興。」舉行註冊儀式時，Edmond卻因整個婚禮流程遲了，故有點緊張，還被許志安笑他緊張到滿頭大汗，行來行去。