【報紙】健仔夫婦賀節賀壽2月食不停

日期: 2009年2月14日
來源: 蘋果日報

馮仁昭四圍超：健仔夫婦賀節賀壽2月食不停

張衞健同太太張茜上月係菲律賓擺酒，其後就雙雙飛去北京，四圍吃喝玩樂度蜜月。日前有人係北京至潮地方南鑼鼓巷既過客餐廳撞見健仔夫婦帶埋外母撐枱腳，由於呢間餐廳主打中西 fusion菜，所以當日佢地都點左較特別既菜式，例如新疆羊肉 pizza，最難得係外母都話啱食，仲大讚個女同女婿夠孝順。

張衞健同張茜北京南鑼鼓巷一餐廳搵食，全程由張茜發辦，健仔亦一臉滿足。

健仔同張茜周不時中、港兩邊飛，原來佢地有個開餐協議，就係健仔專責香港飲食，如果張茜來港，去邊度開餐由健仔話事；調轉健仔北上既話，就由張茜做飲食部揸 fit人，所以日前佢地係北京食晚餐預祝婚後第一個情人節，健仔都係交由老婆大人揸旗，而健仔對呢餐飯相當滿意，大讚老婆有心思，佢話：「幾好呀，唔想成日都燭光晚餐，今次幾有風味。」

張衞健同張茜及外母撐腳，大擦中西 fusion菜。

送禮送到怕

健仔又話每年踏入2月都忙到甩轆，因為2月8號係佢生日，2月18號就到張茜生日，2月17號就係兩人結婚紀念日，再加埋情人節，所以成個2月大家不停送禮，健仔話：「真係送禮送到怕，所以大家諗不如簡化，淨係慶祝我生日同佢生日就算啦。」

健仔2月8號生日，張茜18號生日，再加埋17號結婚紀念日同埋14號情人節，所以2月齋慶祝都忙到抽筋。

至於健仔送乜野禮物畀老婆做情人節禮物呢？佢竟然話：「冇喎，我送禮物畀張茜隻狗咋喎。」原來張茜係愛犬之人，所以健仔特登送犬隻美容療程畀太太帶隻愛犬去扮靚，佢咁細心又愛屋及烏，唔怪得之冧到張茜咁開心啦！