【報紙】Big Four審人變被審

日期: 2010年4月21日
來源: 蘋果日報

Big Four審人變被審  健仔自揭玩一夜情被嗒

何韻詩、容祖兒同劉浩龍呢三個緋聞男女，噚日去咗尖沙嘴接受無綫生活台節目《 Big4大四喜》訪問，節目錄影前，主持許志安、梁漢文、張衞健同埋蘇永康預備咗啲卡紙畀嘉賓即場寫問題，三個緋聞男女冇避忌邊講邊笑研究點寫，結果健仔抽中咗劉浩龍寫嘅「有冇試過 one night stand」，健仔好大方咁承認：「係有嘅，我嘅初戀係由 one night stand後開始發展，係人哋嗒我。」

Big Four四個大男人企埋一齊，最叻係互相爆料同搞笑。

想聽安仔秘密

三個緋聞男女合照過後，阿詩俾人追問有冇尷尬，佢就話：「我已經豁出去，佢哋四個人（ Big Four）搵我做嘉賓嗰陣，已經知佢哋立心不良，四位師兄係老前輩，我尊師重道，咪當完成佢哋個心願，我同祖兒會採取放棄嘅態度，好似軟皮蛇咁任你問，反而師兄（劉浩龍）就好擔心，日日都打電話問我點樣答好，我咪同師兄講你不仁我不義，橫掂都知道佢哋四個唔少嘢，最多齊齊擺上枱。」後來阿詩又話自己最想安仔抽中佢嗰條「俾邊個女友傷得最深」，雖然佢知道安仔好多嘢，但係都想聽吓佢嘅答案喎。

張衞健俾劉浩龍一問，就直言自己試過一夜情。

祖兒都笑住話：「我識咗佢哋四個好耐，又係我嘅偶像，所以都希望佢哋手下留情，最初佢哋只係搵我同阿詩，係我提議搵埋師兄，我真係烏 sir sir，初初都諗唔起（緋聞），後來醒起就覺得自己整咗個陷阱畀自己跌落去，但係我同阿詩已經設計咗啲答案，一於你有你問，我有我答。」