【報紙】劇迷: 想睇張衞健等到頸長

日期: 2018年10月5日
來源: 晴報 / Lifestyle生活副刊

傳蔡思貝拖累《大帥哥》淪倉底貨 劇迷︰想睇張衞健等到頸長

去年初無綫邀得張衞健（Dicky）回巢主演民初劇《大帥哥》，原本以為會是今年台慶劇之一。不過，有傳因女主角蔡思貝的「姣精」形象太深，無綫臨時抽起改播視帝王浩信的《兄弟》。有觀眾希望盡快睇到Dicky的演出；有人卻嫌該劇特技一般，欠睇頭。

96年拍攝無綫劇《西遊記》爆紅的張衞健，一向觀眾緣甚佳，相隔超過20年回巢拍《大帥哥》，無綫曾高調搞記者會，並出動兩大高層曾勵珍及樂易玲出席Dicky的簽約儀式，排場十足，令各界寄望甚殷。不過，日前無綫公布今年的台慶劇名單，分別是《跳躍生命線》、《是咁的，法官閣下》及《兄弟》，而萬眾期待的《大帥哥》竟然榜上無名，令人摸不著頭腦。

蔡思貝難得與兒時偶像張衞健合作，豈料有傳因她的形象問題，連累Dicky變炮灰。

事實上，《大帥哥》有Dicky擔大旗，加上蔡思貝、洪永城及曹永廉等，卡士絕對不比今年三齣台慶劇遜色。然而，昨日有報道指《大》劇因女主角蔡思貝緋聞多多，兼且形象麻麻，無綫怕她影響收視，臨時決定改以《兄弟》作台慶劇，順道捧「親生仔」王浩信再奪視帝。

雖然劇集煞科已超過一年，但Dicky上周仍抽空與劇中拍檔李嘉（左）及徐榮（右）飯聚。

不少人認為張衞健具號召力，將其回巢作變倉底貨，絕不合理；有人卻指他太Out難吸客。此外，昨日有消息指無綫與優酷、TVBC共同推出「全球同步劇系列」，以致《大》劇即使是自家製作，亦由於內地批文未出，所以暫時未能在港播映。