來源: 晴報
張衞健心痛媽媽歷劫 細數孝子四大報恩舉動
雖然TVB套《大帥哥》已經播完，不過被譽為「娛樂圈孝順仔」、「絕世好男人」的張衞健孝心永不停止。就好似日前張衞健就被拍到與80歲的媽媽甜蜜行街街，待母至孝，母子情深。原來媽媽要去中環診所睇醫生，張衞健就做柴可夫驅車接載，更加全程陪同媽媽，最後睇完先扶住拿著醫療報告的她離開。期間他望實媽媽的眼神既緊張又溫柔無比，為免母親行得太遠，又先行一步取車，把車駛近媽媽身旁才護著她上車，非常細心。近日張衞健常常更新微博：「當你想起飛鳥翶翔天空，一無掛慮，也得飽足，就會明白我怎會置你於不顧呢 (太6:20) ......我們對身邊的人真的夠愛嗎？」，情話掛在嘴邊，的確是個暖男！
媽媽歷劫做仔心痛
現年54歲的張衞健生於單親家庭，爸爸在他讀中二時已離開家庭。身為長子，張衞健知道媽媽余嘉碧要一個人照顧家庭好辛苦，所以一入娛樂圈就日以繼夜開工，連凌晨都度稿，希望賺到更多錢讓母親不用捱苦，享吓清福。不過於2013年，她在尖沙嘴一酒店的泳池游泳期間遇溺。雖然由當值救生員救起並現場為她進行急救，但被送往伊利沙伯醫院時由於情况危殆，兩度停止心跳和呼吸，隨即轉送入深切治療部。身在杭州工作的張衛健知道後立即搭夜機趕返香港，幸而經過一輪搶救後出現奇跡，媽媽醒返，但因年紀老邁身體機能一直下滑，自此張衞健更加珍惜與媽媽相處的時光，更加錫住她。所以平日他一有時間，都會陪媽媽做她喜歡的事，如游泳、食飯等，更加會叫埋老婆張茜陪她飲茶。
1. 為媽媽減產 仲日日傾電話
儘管同香港觀眾暫別25年後《大帥哥》好收得，不過張衞健已經減少產量，處於半退休狀態，近年都希望留港花更多時間與媽媽相處，即使不在身邊，每天也會至少致電一次傾偈，讓她安心。
2. 同媽媽捉棋特登輸
每逢有時間張衞健都會同媽媽下波子棋，特登玩10場輸10場：「訓練她動動腦筋」。雖然媽媽每行一步都會低頭望著棋盤沉思良久，有時又會無視原來玩法亂走，不過張衞健沒有揭發，反而好有耐性繼續等，又趁媽媽睇唔到時偷拍她，好甜蜜。
3. 拖媽媽手行街
張衞健常常陪同媽媽行街，例如早前陪媽媽到花市買花，返到家還陪她插花，他留言：「我認為對於老人，我們的陪伴是最重要的。」兩母子每次出街都會繑住手，有講有笑，好溫馨。即使張衞健知道有記者影相都沒有黑面，仲笑容滿臉叫記者小心，唔好嚇親老人家。
4. 帶媽媽返工
於《大帥哥》試造型時，又帶她一同出席，讓媽媽化身「大帥妹」。
沒有留言:
發佈留言