【報紙】張衞健窒BIG FOUR兄弟演技渣

日期: 2020年2月5日
來源: 東方日報

張衞健窒BIG FOUR兄弟演技渣

「大帥哥」張衞健出名計仔多多，歌影視瓣瓣掂成大紅人！他自爆曾想過孖BIG FOUR成員合演舞台劇，為觀眾帶來新鮮感。而有「愛妻號」之稱的他，亦大方分享夫妻間「保鮮」Tips，就是不時製造驚喜，不要一味老奉！

張衞健（Dicky）曾揚言若醞釀好一個新角色，就會於公仔箱再會觀眾，不過他近日接受本報專訪坦言未有「成果」，Fans們可能要再等等。據知，有主辦方曾接觸他斟開棟篤笑，問到現時十劃有一撇？他承認有此事︰「始終都覺得自己係演員，就冇的起心肝搞，加上件事都好難，全部稿都靠自己，雖然我擅長係度劇本，但度棟篤笑都要有少少天賦，所以一路都話係諗吓，冇推嘅，可能有日我戚起條筋想做呢！」

張衞健笑言可能有日戚起條筋想做棟篤笑。

棟篤笑暫未有着落，問到會否再與BIG FOUR開演唱會？Dicky竟搞笑話可免則免︰「由組成嗰日我都好勉強。（有內訌？）我哋從來都冇相親相愛過，但反而有諗如果BIG FOUR有機會做一個舞台劇會點呢？對我哋、觀眾都有多啲新鮮感。」他續賣關子稱有構思過，更曾齊齊坐低傾過，惟他對兄弟的演戲細胞有所保留，抵死窒爆︰「同佢哋做都擔心o架！因為覺得佢哋冇一個演戲好，除咗Edmond（梁漢文），我有睇佢套劇集，係做得幾好。」

結婚16年拒絕老奉

其實想睇Dicky演出都不是難事，他早前孖老婆張茜拍內地真人騷節目，玩煮飯仔大晒恩愛，問到不介意在鏡頭前放閃？答覆總是令人摸不着頭腦的Dicky卻指介意︰「唔鍾意o架！其實人哋都邀約過好多次，我覺得係盛情難卻所以做，一次半次唔多，好少一齊做節目，做訪問都係試過一次。」

與老婆張茜結婚多年，依然恩愛！

問到結婚16年如何保鮮？他教路要驚喜不斷，最緊要唔好老奉︰「老婆煮飯唔好老奉冇多謝、唔該、錫啖，一老奉就冇晒感覺，簡單到依家佢夾餸畀我，我都會講唔該，又唔會因為結婚咁多年唔出街拍拖，仲會成日畀小驚喜，去街會買啲嘢畀佢，又會買花，有時又會寫字條、傳紙仔。（渴望要小朋友？）唔渴望啦！今時今日成幾十歲都唔覺得自己係個完全熟透嘅男人，好多時都仲好幼稚，喺老婆面前簡直仲係個小朋友！」