【報紙】出騷遲到! 張衞健送番茄賠罪

日期: 2021年11月22日

來源: 東方日報

出騷遲到！張衞健送番茄賠罪

隨住「大灣區哥哥」張智霖及陳小春等參演的內地真人騷《披荊斬棘的哥哥》落幕，另一個選秀節目《追光吧！》又上場，今次香港代表就有張衞健（Dicky）及吳鎮宇、台灣方面有吳建豪及楊宗緯等「哥哥」參加，《追》有冇《披》咁大回響就要拭目以待，但係有關《追》嘅消息就開始喺網上流出。

張衞健出騷遲到！

張衞健90度鞠躬向觀眾道歉。

張衞健送番茄畀導演。

最近有網友就喺社交平台甫咗Dicky嘅片，見到趕頭趕命嘅佢，好有禮貌咁不停為遲到而道歉話：「因為剛剛下機，所以來晚了些。」之後連仆帶跑咁衝上台，向現場觀眾作90度鞠躬，謙虛到冇朋友。之後佢就送上一袋禮物，雖然唔係名貴，但絕對係物輕情義重，因為佢送畀導演嘅，係一袋象徵電視台logo嘅番茄，佢仲同導演講：「孝敬你！」。導演收到呢份「厚禮」笑得好開心，多謝呢份濃情厚意，Dicky講笑說：「那我覺得今年這個一公演，晉級應該不是問題。」見導演明白佢份禮嘅箇中心意，都哈哈大笑埋一份，全場氣氛就畀呢兩位仁兄嘅妙語如珠炒熱晒。