【報紙】張衛健教做人自認學不來

日期: 2001年2月19日
來源: 星島日報

張衛健教做人自認學不來

古語雲： 「 學無前後， 達者為先。 」 說穿了其實同天下文章一大抄， 只差在邊個抄得好睇意思差不多。

張衛健演藝生涯一直都同個抄字結下不解緣， 拍電影《 一本漫畫走天涯Ⅱ 》 被外界批評抄周星馳； 近期的電視劇《 小寶與康熙》 ， 又被人認為佢學足梁朝偉；唱歌又被人話似哥哥張國榮的唱腔。記憶中只有《 西遊記》 中的一句「 YO ！ ！ 使乜驚呀！ ！ 」 較為有自我風格。不過對於被指模仿梁朝偉， 張衛健直認不諱說： 「 我都有嘗試學佢。 」 只不過究竟係點學法呢？

站於演員角度， 張衛健認為自己身分唔止一個演員咁簡單， 「 編劇寫劇本既時候， 唔會知拍呢場戲時D道具會點擺， 唔知演員會點企， 攝影機會點擺， 但係我深信， 演員到達拍攝場地時， 見到當時情景一定會有好多新靈感走出黎 ， 知道點樣可演得比劇本所寫的更好。 其實在我未曾有機會做主角時已經有咁既諗法， 將一個好好既劇情昇華到更好境界， 繼而令到個編劇欣賞我， 令到下次編劇寫另一角色時， 都會同監製和導演講想搵張衛健， 個角色最好 係佢拍。 我呢種做法我已經習慣左十幾年架啦。 」

雖然張衛健講得十分輕鬆， 他亦表示曾有一段時期受到這種演繹方式困擾， 感到非常辛苦， 要請教梁朝偉去解決： 「 記得個時同佢( 梁朝偉) 拍電影向佢訴苦， 覺得好辛苦呀！ 讀完劇本， 成日都要諗下點改進， 不過偉仔就話佢唔會咁樣 ， 收工就收工， 一收工就要Relex 自己， 返屋企唔會諗劇本， 淨係歎下啤酒同砌下模型， 要諗既時候， 都係去到場地先諗。 我有嘗試過學佢呢種方法， 一於乜都唔理， 話收工就收工， 但係始終都習慣唔到， 一返到屋企就係咁諗係咁諗， 可能我十幾年來已經習慣左 。 各施各法啦！ 」

張衛健曾揚言： 「 如果我贏到TVB 的話， 我就會結婚。 」 如今他經已贏了TVB ， 但對當日的一番話， 卻認為有少少戲言， 因為他從來無想過有贏TVB 的一日， 唔想將結婚變得同任何事掛鈎 。 「 當日爹地同媽咪分開時， 唯一對我有正面既影響， 就係我親眼見到爹地令到我媽咪好傷心， 令我係十幾歲時已經決定左 ， 將來我的結婚對象一定係我終生伴侶， 唔要學佢( 父親) 咁傷害一個家庭， 所以我選擇太太時會特別謹慎， 唔想有任何出錯， 但如果對方覺得我太認真會畀到太大壓力， 我諗我都唔會同呢個人一起。 愛情難得有一個人對你認真， 如果唔係？ 要唔要都罷啦！ 」

藝人總會想到退休的一日， 雖然如今張衛健人氣再度反彈升至頂點， 但他卻對退休早已定下目標， 「 到有一日我再做唔到主角既時候， 我會退下來做社工， 好開心咁每日都幫到人， 我講呢番說話唔係希望大家對我加分， 而係我真係咁諗， 因為我係天主教徒， 我相信有天堂同地獄， 我信乖仔死左會上天堂， 衰仔就會落地獄。 」