【報紙】回港為《機靈小子》重新配音

日期: 2001年7月17日
來源: 星島日報

張衛健回港重新配音 《百萬富翁》收視佔6成做大贏家 

無綫《港姐總決賽》硬撼亞視《名人慈善百萬富翁SHOW》，估唔到無綫出動埋遇襲受傷後，初次現身港姐show的曾志偉，都只係贏了記者的閃光燈，卻輸了收視，平均只得21點；相反《名人慈善百萬富翁SHOW》就成為大贏家，取得六成一收視，最高39點，平均30點。幸好福將張衛健的《機靈小子》，在劣勢中仍可以兩點之微壓倒《百萬富翁》，為無綫搶回少少顏面！

港姐總決賽當晚，雖然阿叻同阿倫不停預告新聞人物曾志偉會出場，又有三大天王加天后陳慧琳助陣，不過收視認真慘淡，由開始到尾聲一直徘徊廿點，就算有志偉現身的第四環節，都係低收21或22點，但最意想不到的，是揭盅誰是港姐冠亞季的時刻，只得19點新低。相反亞視的《名人慈善百萬SHOW》，就一直㩒住無綫來砌，除了在開SHOW時錄得22點收視外，其餘時間均節節上升，到最後一節更升到歷史新高39點，而全個節目的平均收視達30點，取得六成一的觀眾，這個數字對於亞視來說，絕對飲得杯落。

不過身為亞視老闆的封小平就話自己唔會囂，又話今次只是幸運，並說：「雖然有六成收視，但我哋唔會滿意，亞視本身還有好多問題，企得愈高就愈要小心，唔係好易出錯，所以依家未係開香檳時候，我哋仲要繼續努力，贏係未來嘅事。」封小平個口係咁講，不過他的行為就出賣了他自己，因為他極度亢奮的心情，不但溢於言表，還在臉上流露着「四萬」笑容，見到記者則問大家看哪一個台？

至於一向贏開的無綫，今次連慣性收視都不保，輸足成條街，難怪昨日想找製作部總監何麗全或是港姐監製衛世輝問兩句，都搵唔到人；只有外事部助理總監曾醒明獨撐場面，他說：「公司對此收視係感到失望，但係事實亦要接受，其實台前幕後、司儀和歌手都排練了相當長時間....... 在接受之餘，我哋亦會作深入檢討，為來屆作審慎的參考。」講講吓，曾醒明將話題轉向，講番無綫的《陀槍師姐Ⅲ》點贏，又話無綫的變陣有效，收視會穩步上揚。

其實，無綫改時段，找來福將張衛健的《機靈小子》代替《全線大搜查》出戰，迎戰亞視的重頭節目《百萬富翁》，已為無綫搶回不少流失觀眾，在星期一至五的硬撼時段，《機》劇收視有22點，比《百》高2點，已佔回五成收看人數。其實張衛健明知與《百萬富翁》硬戰，在劇集未推出街前，已秘密回港直入無綫清水灣電視城，為《機靈小子》重新配音，因為《機》畢竟在內地製作，對白針對內地市場，所以今次健仔此行，主要是為了迎合香港觀眾口味，在對白加入香港式的流行元素，藉此帶動觀眾對劇集的興趣。