【報紙】客串鍾馗 霆鋒將阿媽當禮物送健仔

日期: 2002年1月28日
來源: 新報

客串鍾馗帶埋拉姑探班  霆鋒將阿媽當禮物送健仔

謝霆鋒加入娛樂圈工作以來﹐從沒帶過父母出現拍戲現場﹐莫說是探班﹐但今趟義務客串張衛健主演的《齊天大聖孫悟空》﹐卻罕有地山長水遠帶媽媽狄波拉探班﹐還將拉姑當禮物送給張衛健。

前日下午霆鋒由北京飛往橫店﹐拍攝「齊」劇飾演少年鍾馗﹔雖然晚上九時才開工﹐但霆鋒下機後﹐小休片刻便帶著拉姑往拍戲現場探班和為張衛建打氣。而為了給個驚喜予Dicky (張之洋名)﹐霆鋒鬼馬地保密﹐並指帶了一份會郁的禮物而來﹐到場更和Dicky弟弟Henry夾計﹐由他打頭陣﹐從後攬住Dicky﹐著Dicky猜是誰﹐當然一估即中﹐跟住輪到估拉姑﹐Dicky即說﹕「阿媽﹗」拉姑即笑道﹕「係就係阿媽﹐不過唔係你阿媽﹗」

Dicky拉姑有淵源

當謎底一揭開﹐Dicky喜出望外﹐與各人扭作一圈﹐原來Dicky與拉姑有著一段淵源﹐早在十多年前二人在一套電影內飾演母子﹐戲演完﹐但兩人感情好到不得了﹐自此Dicky每年母親節都送卡和送花予「媽媽」拉姑﹐Dicky開心得說道﹕「好開心今日一次過見到兩個阿媽 (拉姑和恬妞)﹐今晚要同佢哋食飯慶祝﹗」Dicky對於霆鋒這份「郁得」禮物感激之餘還說﹕「今次霆鋒係義務唔收錢﹐佢咁有義氣真係唔知點算。」

前衛鍾馗造型

霆鋒笑說﹕「我未識寫字就知道Dicky送卡送花畀阿媽﹐知佢 (Dicky) 掛住咪帶埋佢 (拉姑) 上嚟。」而霆鋒這個少年鍾馗造型﹐摒棄傳統紅紅綠綠的化妝﹐髮飾更是前衛閃電造型﹐型仔非常。霆鋒即場解畫道﹕「 民間誤會嘅﹐其實鍾馗好靚仔﹐連皇帝後宮佳麗都追佢 (鍾馗)﹐後尾皇帝貶佢做庶民﹐後來仲自殺死﹐落到地府﹐經感化後為民間捉鬼﹐不過皇帝好妒忌特登劃花佢塊面。」霆鋒更笑謂很滿意此個造型﹐很有新鮮感﹐但戲服略為長﹐拍吊威也戲時略為阻礙。而霆鋒向來工作認真﹐今趟也不例外﹐無論吊威也倒吊､轉圈﹐都是親身上陣﹐絕不欺場。