【網絡】張茜情征第七個聖誕

日期: 2005年12月4日
來源: 台長KKK

張茜情征第七個聖誕

今年是他們拍拖以來第七個聖誕節，連阿茜也說：「好犀利！」由於她與健仔各有各忙，見面時間實在太少，相聚時間由一星期至一兩天不等，再惡劣一點二三個月也沒機會見面，期間分開時間好長，這段感情可以維繫七年時間實在很難得。她說：「自己都感到好自豪！我唔係香港人，健仔又唔係大陸人，我哋分開得好遠，能夠行埋一齊咁多年實在很奇妙，是一種緣分。」

張茜與健仔經常分隔兩地，平日全靠電話聯繫，一個月的電話費閒閒地要數千元。阿茜笑笑口說：「七年來加加埋埋的電話費可以做首期，幾十萬一點也不誇張，所以我要努力工作搵錢。」

「快啲拉埋天窗咪可以慳番電話費？」

「快啦！我哋兩個走唔甩，不過唔可以為結婚而推晒所有工作，時機成熟就會結。依家我哋改咗用e-mail通訊，一來可以慳唔少電話錢，二來可以互傳有趣短片。」

拍拖電話費幾十萬。

「健仔是不是一個浪漫的男朋友？」

「佢係非常浪漫嘅人，唔係普通浪漫果種。記得有一年聖誕節，我收工返房間見到佢攬住束花坐喺梳化，當時我好感動，好多時沒心理準備下給我驚喜，我諗無人唔鍾意驚喜。」

鬼馬遇老實走唔甩

「一個是鬼馬男朋友，你點形容自己？」

「我係老實女朋友，嘻嘻！」

「圈中不少靚仔有沒有心動過？」

「無感覺！」

「咁死心塌地，對健仔有甚麼評價？」

「佢係一個好人，心地善良，好勤力。一個人幾靚都好，總有一天會老，單是靚仔無Feel，傾唔到偈是不會長久的，我鍾意健仔的性格及內在。」

「今年會否與健仔出埠過一個白色聖誕？」

「都未知。我本身好鍾意聖誕節，北京落雪好靚，張燈結綵，氣氛不比香港差。」

在《伙頭智多星》劇集她與健仔第二次合作擔當男、女主角，雖然她不抗拒與男友合作，但她怕被觀眾看厭，所以希望與不同演員合作，未來一段時間她會主力拍內地劇集，與不同對手合作演技才會有進步。

過去多年她接拍劇集沒有停過，她發覺身體愈來愈差，而且沒時間陪家人，所以新一年她會好好安排自己時間，最理想是一年拍兩部劇加一部電影，其餘時間陪家人及男朋友，保持最佳狀態見觀眾。