來源: 忽然一周第795期，媽咪姐手帳
黑客累張衛健患胃癌
周日（ 17日）凌晨三點幾，張衛健喺微博表示要退出娛樂圈，之後仲話自己患上末期胃癌，因而要同老婆張茜離婚。呢個消息隨即引來圈中人陳小春、鍾欣桐、梅豔芳前經理人 Marianne等，以及唔少網民紛紛留言慰問，搞到微博大塞車。
張衛健周一下午喺微博發聲明澄清，佢接受傳媒訪問時仲話自己可以「老虎打死幾隻」，身體絕對冇問題。
天有不測之風雲，微博有黑客入侵！（設計對白）
澄清冇患病
由於事出突然，媽咪姐嘗試聯絡健仔證實，不過電話打唔通，個心就一直囉囉攣。直到清晨 5點幾，終於有人出嚟講嘢。健仔老友梁漢文留言表示已聯絡健仔，原來健仔嘅微博俾黑客入侵，簡單講句，即係成單料都係假嘅。到周一（ 18日）下午，健仔喺微博澄清，指佢家庭、健康都冇問題，一切安好，叫大家放心。唉，峰迴路轉原來都係虛驚一場，不過，好人好姐無喇喇被傳病危，你都咪話唔大吉利是！
沒有留言:
發佈留言