來源: 東方日報
吳國敬一半身家接濟健仔
唱作人吳國敬入行多年，足迹由幕前遍布到幕後，近日再轉回幕前夥拍鄧建明（Joey Tang）開演唱會。人緣極好的阿敬決定開騷，圈中好友一口答應任嘉賓，包括跟他識於微時的死黨張衞健，而抵死幽默的健仔重提往事，感激對方於困境時借他五百蚊，因那是阿敬的一半積蓄！
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
吳: 吳國敬
張: 張衛健
Rock得起
張: 我頭先嚟畀差人抄咗張牌，我一落車差人就攔住我話: 「先生雙黃線唔停得車。」我已經即刻講: 「唔好意思阿Sir。」個阿Sir話: 「我識你，但我唔識佢喎，指住我司機，於是就照抄啦。」幾錢呀依家抄張牌？
吳: 哈哈，三百二十囉，得啦得啦﹗爭住先啦，你真係唔話得呀。
張: 咩唔話得呀，成三百幾要你畀番呀。你個騷下個月開喇喎！
張衞健與相識數十載的吳國敬，談到往事時滔滔不絕。
吳: 所以依家又緊張又開心，你都知道我最鍾意就係夾Band，同Joey合作兩個都咁Rock，一直都畀人稱呼做「搖滾孖寶」，所以今次都會唱快歌為主。
張: 咁等我練番首Rock版嘅《萬惡淫為首》，冷得我騰騰震呀.....
吳: 好呀好呀。
吳國敬於2003年開騷，相隔十年，一眾好友十分期待演出。
吳國敬開騷感觸落淚。
再轉幕後
張: 其實喺成班朋友當中呢，只有阿敬你一個係創作型，特別喺音樂上面，有咁多創作，我諗成班朋友你都寫過晒歌畀佢哋啦？
吳: 寫過晒啦。
張: 謝霆鋒有冇呀？
吳: 有呀，寫過兩、三隻畀佢。
張: 佢出咁少碟都有寫過，真係勁！加上你本身又識唱歌，其實你兩樣嘢都可以兼顧，你估雷頌德唔想唱呀，響佢面前都咁講，你唱得好過佢啦！
吳: 因為有個階段個人比較冇信心，我九五年喺幕前做得唔開心，又唔順利，所以就轉幕後，諗住寫歌維生，好彩個天又照顧我，到依家你哋又鼓勵我，仲唱得兩嘴不如操Fit啲，畀啲信心自己。
張: 仲有呀，其實你幫人作咁多歌，應該諗吓開騷時要唱番。
吳: 我當然會唱，但係咁多歌都唔知唱邊隻，依家都頭痛緊。
張: 唱《哎呀哎呀親親你》呀！
吳: 係呀，嗰隻好嘢嚟架，但唔係我寫喎。但仲有時間諗，同你哋BIG FOUR去英國做完巡迴，返嚟先開始籌備，同埋操體能，因為我膝頭關節唔好，骨膠原唔夠，要做跑步機。
張: 簡單講即係冇咗「膠」用囉，咩「膠」都冇咗，好大件事喎，你快啲睇醫生呀。
吳: 冇辦法啦，以前踢波整親嗰啲舊傷。
張: 阿梁（梁漢文）夠踢波啦，又唔見佢整親。
吳: 咁佢叻吖嘛。
拍劇彈起
張: 講真呀！我由小學三年級開始識你，睇住你入行第一隻碟Hit咗，到後來話要轉去幕後寫歌，好替你開心，亦有好多人想聽你唱歌出碟，所以我哋朋友間都好期待。
吳: 唔止出番嚟唱歌，我都有同曾志偉講想去TVB拍劇，但從你身上知道拍劇唔簡單。
張衞健飾演的孫悟空，紅極一時。
吳國敬亦有份演出《齊天大聖孫悟空》。
張: 當年我事業低潮時，有次我拉埋你陪我上深圳唱歌。
吳: 我嗰晚喺酒店見你一路都坐喺書枱度不停寫，於是睇吓寫咩，原來喺度改對白同劇本。
張: 係呀，因為《老友鬼鬼》個劇本係我寫。
吳: 我仲問你，咁辛苦做咩呀？點知你話：「死o架啦！今次再唔彈起要轉行揸的士！」我知道你當時經歷好大困境，為咗一個機會要付出好多，拍劇唔止係背劇本，做表情咁簡單，所以我真係好服你，真係抵你紅，遲吓我拍劇都要問吓你請教。
張: 睇吓我到時得唔得閒先啦。
搞鬼的張衞健於BIG FOUR演唱會着全裸大隻佬衫。
雪中送炭
張: 不過印象最深係當時困境窮得好緊要，我問你借五百蚊，你即刻畀我，跟住我話你都幾好嘢，話畀就畀，究竟你銀行有幾錢o架？你答我得八百蚊，呢吓雪中送炭真係好感動！
吳: 你夠係啦，嗰時大家都冇咩錢，你突然送份生日禮物畀我。喂，我六月生日嗰時先二月，肯定知我冇咩錢，冇衫着好似乞兒仔咁，借啲意送嘢畀我，仲要係送件二千幾蚊件衫畀我，我當時手都震埋，二千蚊對當時我係天文數字嚟o架。
張: 其實係我做完騷着完，貼番個牌上去當新衫送畀你。
吳國敬與張衞健老友鬼鬼，常互相扶持。
吳: 其實我感受到你對我好好，從一個識於微時嘅小學同學到依家，我哋交情唔係一般人嗰種，同事同行咁簡單，你太了解我啦。
張: 不單止我哋兩個，成班朋友都有好多經歷，互相鼓勵、幫忙同借鏡，你睇我都衰咗咁耐，跟住都可以好啦，依家我哋都等緊睇你表演o架。
文: 曹家誠
攝: 司徒國榮
場地: Where
沒有留言:
發佈留言