【報紙】張衞健長篇幅回應:「浪子回頭」

日期：2013年4月14日
來源：蘋果日報

張衞健長篇幅回應細佬控訴:「浪子回頭」

近日張衞健（Dicky）被親弟兼前經理人張衛彝（Henry）大控訴，要求Dicky一星期內歸還20%因託管同代為投資嘅佣金同資產。Dicky於記招當日，同媽媽聯合發聲明，強調絕無虧欠家人。

Dicky前晚冇同Big Four一齊亮相吳國敬同鄧健明喺九展舉行嘅《Man’s Icon Concert 2013》，不過噚晚尾場呢，Dicky終於出現，擔任表演嘉賓，台上繼續大放笑彈，不過接受記者訪問，就收起笑容，好嚴肅咁講出以下內容：

「由17歲起，我開始履行長兄為父嘅責任，至今依然在履行中。我唔係首次被我嘅家人傷害，而我一直抱著沉默態度，原因係深深相信保護家庭成員係我嘅天職，直至今次、反而係我哋嘅媽媽主動說要出來講幾句話還我一個公道。  

「所以前一日，媽媽同我透過律師發出咗聯合聲明，聲明中嚴正澄清及否定近日對我嘅控訴係絕對不實，聲明中，媽媽亦強調我冇虧欠家庭任何一位成員任何嘅東西，亦強調多年來我對家人係盡心、盡孝、盡義。而對我本人而言，都唔打算逐一反駁不實嘅控訴，我所有想帶出嘅訊息已喺聲明中講得好清楚。  

「而日後媽媽、我同其他家庭成員，都好期待睇到我嘅細佬（Henry）可以浪子回頭，我們希望有一日唔使再飽受『見鐵不成鋼之恨、見人不見靈之痛』，我繼續會以保護家人為我嘅天職，努力履行做好哥哥、兒子、丈夫、演員嘅責任。」

講完後Dicky就雙手合十離開。