【雜誌】張衛健吳國敬鬥扯煙

日期: 2013年4月12日
來源: 3週刊，第705期，好姨廣場

 張衛健 吳國敬 鬥扯煙

吳國敬、許志安、梁漢文、張衛健同蘇永康五個向來都係好兄弟，但兩年前有傳因為組合「Big Four」冇預吳國敬，而令到兄弟反目。但傳聞歸傳聞，事實上佢今日仍然係好朋友、好兄弟，尤其大家係小學同學張衛健同吳國敬最老友。

早前好姨就撞到佢兩兄弟係銅鑼灣食飯，當晚張衛健同埋阿媽、工人，約吳國敬同女友食飯。為遷就張衛健同吳國敬呢兩個煙民，一行五人坐露天位置。唔知張衛健係咪掛住老婆張茜，定抑或要減肥，成晚佢食都唔多，只係顧住扯煙同吹水。食到咁上下，吳國敬都加入埋扯煙族。最難得係兩兄弟識咁多年，張衛健見兄弟食煙，即刻拿拿淋借個火機幫佢點煙，所以話佢兄弟反目，真係講到冇人信。

佢一食就食兩個鍾，最後由吳國敬埋單。之後兩兄弟各自離開，吳國敬好有禮貌咁同張媽講bye bye。

之後，張衛健就同媽咪一齊行番去附近停車場車。其間有fans要求健仔合照，心情大靚佢來者不拒。兩兄弟飯聚，一個帶阿媽，另一個帶女友，似十足一家人，所以兄弟又點會有隔夜愁。況且，今年「Big Four」已經請吳國敬做嘉賓，有錢大家齊齊搵。