來源: 蘋果日報
張衞健陪媽咪覆診蹺到實
【中環】
張衞健嘅媽咪、75歲嘅余嘉碧，自從上個月喺尖沙嘴洲際酒店泳池游水遇溺昏迷，死過翻生之後，近日已經游番水見證邊度跌低，邊度爬番起身。侍母至孝嘅健仔雖然經常要返內地拍劇，不過一得閒就會陪媽咪，前日仲同媽咪去睇醫生順便行街㖭。
健仔蹺住媽咪過馬路，啱啱復原嘅張媽媽行得比較慢。
張媽媽落車後好自然咁交個手袋畀健仔，然後着番件衫。
行街睇銀包
前日下晝4點健仔充當司機，開住架7人車載媽咪去到中環嘅置地文華東方酒店，佢先將架車交畀酒店嘅代客泊車，然後就扶媽咪去咗Harvey Nichols嗰度行街，佢哋兩母子似乎對銀包好有興趣，研究咗一陣，本來睇得好開心嘅健仔，當佢發現有記者影相嘅時候，面色即刻變得唔多好睇。
健仔兩母子似乎對銀包好有興趣，研究咗好耐。
睇多10分鐘左右，健仔就同媽咪行咗過對面嘅戲院里，再上咗一幢診所林立嘅商業大廈，相信係張媽媽覆診。大半個鐘之後健仔帶住媽咪落樓，當佢見到仲有記者喺度等嘅時候，佢就咁話：「影還影，唔好撞到我阿媽，都冇乜好影喎。」兩母子跟住喺中環煤氣燈街再行咗一陣之後，健仔就同媽咪去返文華東方攞車，佢先照顧媽咪上咗車，然後畀咗一百蚊貼士個代客泊車嘅職員，再自己上車離開。
健仔畀咗100蚊貼士代客泊車，再上車離開。
張媽媽上個月喺泳池出事，不過佢好快克服陰影再去游水。(轉自張衛健的微博)
沒有留言:
發佈留言