來源: 星島日報
張衛健自爆當年令二人翻撻 Sammi安仔齊否認：黐線
鄭秀文昨晚第3場紅館騷演出順利，老公許志安繼續出盡力揮動打氣棒，還有好朋友張達明、蘇永康夫婦等到場打氣。演唱會唱到中段《終身美麗》時，Sammi突然說：「好開心，好開心呀，我把聲清返啦！」觀眾都為她喝彩。接著唱《我們的主題曲》愈唱愈順，此時介紹神秘嘉賓張衞健（Dicky）出場，全場氣氛推至高潮。Dicky身為她老友當然很多料爆，先叫Sammi做老Sam。原來他們曾經在2000年TVB台慶劇《齊天大聖孫悟空》中合作過，Dicky演孫悟空，Sammi演觀音，她表示當時未信耶穌才可以扮演觀音。Dicky爆料：「我當時搵佢演出，話佢知蘇永康演東海龍王，許……志安演唐僧騎嗰隻馬喎！佢聽到個『許』字就雙眼發光，聽埋『志安』直情口吃添！佢話：『咁你問吓唐僧可唔可落地行，畀隻馬我騎吓呀？』我心諗，點會唔肯啫，唐僧邊個做？梁漢文呀，自己友，我出句聲，自己落地下，畀隻馬阿嫂騎啦！」Sammi大笑，他又說：「當時老細仲話：『你係唔係架，搵到鄭秀文嚟拍？我畀多500萬（元）！』結果佢嚟足3日，我乜都唔使做，只係日日對佢講『多謝』，斗零都唔使畀佢，老細嗰5球野（5百萬元）我就袋袋平安，家陣我住緊層樓你有份畀。大家睇到，我係一個飲水思源的人！」
之後Dicky一時形容Sammi「徐娘半老」，一時「風韻猶存」，搞到Sammi扮嬲怒睥他，他才改口「半熟人妻」，還解說：「半熟唔係一個貶義詞，係食家都知，半生熟最好食，食牛扒都要半生熟啦，咁都有人要全熟，重口味啲囉！」他笑言要開電影《半熟人妻》由Sammi主演，將之前收了的500萬片酬物歸原主，他說：「票房收得再開多部《全熟人妻之搵鬼睇》，鬼片，搵羅蘭姐演，羅蘭姐拍鬼片啱晒啦，點計都應該係全熟啦！」Sammi笑到收唔到聲，事後Dicky強調「純屬講笑」！
張衛健大爆Sammi與安仔當年翻撻原因。
Dicky本來想爆Sammi和安仔秘密，他得戚地說：「今時今日許生許太有咁美滿生活 ，我居功至偉呀！」全場歡呼，Sammi說：「關你咩事呀？」同時她索性除去高跟鞋，等Dicky慢慢講。他說：「小弟同老婆喺菲律賓搞咗一場為期三日兩夜婚禮，當時我哋分別邀請咗，當時仲係處於分手狀態的許志安同梁漢文嚟……」全場爆笑，Sammi笑到講不到說話，Dicky立即說：「我喺度澄清，許志安同梁漢文無野㗎吓，鄭秀文唔係煙幕！」他說：「我有理由相信佢哋就喺呢三日兩夜裹，就……成功翻撻！」Sammi立即否認：「黐線！梗唔係啦！唔關你事，你亂講！」Dicky說：「今日你哋開花結果，係咪應該當我老爺，斟返杯茶畀我？許志安喺唔喺度？」觀眾立即指住觀眾席的安仔，但Sammi卻說：「唔喺度！」安仔離遠大叫：「黐線！」Dicky轉向坐第一行的男觀眾入手：「喂，你出嚟扮住許志安先啦！試吓偷跳……條欄河，隔離你老婆？佢話OK喎，你嘥晒大好機會！如果畀著我呀，我……都唔制，我好愛我老婆㗎！」
Dicky愈講愈興𡚒，Sammi打算拉他落台，他不肯離開，說要唱首歌讓她換衫，但Sammi說：「我幾乎都請每個嘉賓唱歌，但係你，唔使啦！趕時間呀，超時罰錢！」Dicky不肯，說：「許太今時今日，一萬幾千過眼雲煙啦！（全場歡呼）我都未講完，仲有：『罰錢？我張衞健畀！』」拉拉扯扯後Sammi屈服，但她要點唱，說：「雖然我知你唱咗幾年首本名曲都係《足球小將》，走埠又係呢首，巡迴又係呢首，不過今晚特別想聽你另一首hit song，對我嚟講喺今次演唱會特別有意義《身體健康》！」她落台之後，Dicky意猶未盡繼續搞笑，又戲弄樂隊，全場笑聲掌聲都未停過！
沒有留言:
發佈留言