【報紙】張衛健一王三后呼籲進修

* 編按:
相關影片可以按這裡觀看。

日期: 2004年6月23日
來源: 蘋果日報

馮仁昭四圍超：張衛健一王三后呼籲進修

張衞健同三位靚女官恩娜、蔣怡同有線新知台主播吳天瑜早排喺數碼港拍攝政府嘅《技能提升計劃影視娛樂課程》宣傳片，目的係呼籲娛樂圈人士進修。健仔今次好有心，唔只一口答應兼唔收錢，重自掏腰包出埋機票錢，專程喺北京飛返香港拍片。

健仔日前同（後排左起）蔣怡、吳天瑜、官恩娜一齊拍攝政府嘅技能提升課程宣傳片。

（左起）官恩娜、蔣怡同吳天瑜要同空氣做對手，好彩表現都好自然。

無綫拒合作

不過馮仁昭聽聞政府最初係想搵齊無綫、亞視同有線三間電視台，各自提供一啲由藝人所拍嘅片段，再剪輯播出。亞視同有線就一早話咗冇問題，反而無綫就諸多推搪，最後重以版權為由推咗，所以政府就只好重新諗過條橋，改為搵健仔同靚女們合作。

今次健仔拍嘅片有唔少電腦效果，所以幾位演員都成日同空氣做對手戲，不過健仔就大讚幾位靚女醒目，好多鏡頭都係一take過。而健仔話宣傳片可以帶嚟正面訊息，佢眼見有啲做娛樂圈嘅人轉咗去揸的士同剪頭髮，不過佢哋對娛圈重有興趣，有咗呢個課程，就可以令人有機會重返呢行，而宣傳片明日就會首播。