【網絡】芝士火腿 (16/9/2003)

日期: 2008年7月28日
來源: 史丹筆記 stanley5

芝士火腿 (16/9/2003)

月前向好友承啟兄借出尹光主演的《老表發錢寒》影碟乙隻，並聲稱該片可能是最好笑、最抵死、亦是最 cheap的港產片 (or even 電影) 。承啟看過後，認為《老》一片還未算最 cheap，他"私人醒"了我一部同年(1993年)的《芝士火腿》。

果然無介紹錯！此片可謂非常無聊兼無厘頭，笑料幾乎可以笑死人！粗口諧音、鹹濕剝削、江湖背語等的"爛gag"可謂無處不在，再加上張衛健的出位演出，極得筆者的喜愛。在此，筆者決定做一件天下間最無聊的事：就是為這部可能是史上最無聊的電影，摘錄其中的笑料給大家欣賞欣賞：
　
第一幕，芝士 (張衛健) 與火腿 (曾志偉) 扮客家婆跑過尖沙咀。他向一名女途人問路，芝士瞪著小姐的胸部問：「請問『奶露臣街』在什麼地方？」 (有人說張衛健只是周星馳的翻版，我絕對反對。我未識周星馳之前，早已識張衛健。)

芝士用水袋裝女人胸，說：「我知點解唔多見葉子楣跑步……打落個肚度拍拍聲好鬼痛。」(那些年頭還會用葉子楣等巨乳女星來搞笑)

行蠱惑的曾Sir在酒吧出現，手臂上紋有「反攻大陸，天長地久」，火腿說：「唔通佢就係歷史悠久個上海皇帝」「杜月……京」芝士答。(無厘頭食字gag一例)

回到芝士與火腿開設的「包出氣公司」，芝士說：「熱到飛街，開個冷氣嘆下先」，火腿說：「有鬼冷氣咩！焗冷氣就有份」(食粗口gag又一例)

Kitty是「包出氣公司」的秘書。七個月試用期無人工，怒氣衝衝要劈炮，芝士說：「一場賓主，"卓"番鑊至走」(剝削gag又一例)

芝士與火腿為"杜月京"被人在尖沙咀街頭打了一鑊，回公司療傷。芝士把煎蛋當烚蛋來為火腿去瘀。火問：「你係咪好肯定係煎蛋，唔係烚蛋。」芝答：「我肯定唔係烚蛋，唔係我切姑煲湯派街坊都仲得。」 (正確的、亦是"出唔到街"的是"切X煲湯派街坊"，古惑仔順口溜)

芝士與火腿剛完成一單Gay佬生意，正研究Gay佬。火說：「可能D人咕咕仔太細比女人笑。」芝說：「可能有D人太污糟，生哂積起鏡面，甲由(蟑螂)都唔黎樓下。」(用gay來搞笑，亦是那個年頭的特色。)

老到要坐輪椅的Leon(劉紹銘飾)有一單一千萬的殺人生意找芝士與火腿。芝士扮廣告：「吓？Leon？真係你呀？我好開心呀！」(表情突變)「挑！幾十歲仲Leon！」 (黎明電話廣告，九十年代的標記)

Leon伯要殺的人是Joey(王祖賢飾)。王敏德是王祖賢的男朋友。芝士火腿在泳池監視他們。芝士說：「點解條仔著住條泳褲仲要樓住條毛巾？一定有"景轟"！」火腿說：「可能佢見到佢女朋友會扯……扯……」「且怕係喇！」(食字gag。從來只有"怕且"，我未聽過"且怕")

芝士扮小朋友混入Joey家，他四處參觀，說：「嘩！呢套Hi-Fi d bass震穿處女膜！」(我記得好幾年前已聽過這個gag，是出由一位貌似"古惑仔"的同學的口中。張衛健扮小朋友，"實驗程度"直迫當年新馬仔扮童子軍)

芝士沖涼時，下體有異樣。原來是他的腳。 (這幕令我想起同期亦有張衛健、張敏的電影《逃學外傳》)

Bobby (吳孟達飾) 是Joey的管家，他懷疑芝士，用一些"正o野"來引出他的真面目。先是"草"，芝士用手指來"隊草"。然後是鹹書，芝士大嗌「索呀！」在書中找出一張萬變咭，「龍珠百九幾億能量戰士閃中閃呀！」(你睇！"索"這個字，張衛健十年前已經用。"百九幾"，又是食字粗口gag)


梁榮忠飾演非常臭串的小提琴家，芝士在Joey不在時向他說：「響朵！」，對方使出黑社會的手印，芝士說：「窗花紅棍大藍燈籠高高掛？」("響朵"、"手印"，是黑社會材料。"窗花紅棍"與"大藍燈籠"亦然，前者應該是"雙"，不是"窗"，指社團打手，後者指社團的新會員。忠仔與健仔都是我一直睇好的演員，但不知何故兩人均未能在影壇上大放異彩，實屬遺撼。)

Bobby用槍指嚇芝士要他講出真相，芝士拿出錄影帶一餅，說：「九十分鐘原裝正版，真人真事，淫賤露骨，Bobby仔，即是你，打飛機過程實錄全無格仔……比番你……無呀！dup左十萬餅之嘛……即刻解除武裝！」「唔解又點？」「咁咪廟街各大鹹帶檔均有發售」(我曾嘗試把周星馳、張衛健的笑料gag，例如順口溜、三字經、黑材料、粗口和特別用語，介定為「廟街言語」，因為那些言語是市井之徒、三教九流、低下階層人士的習語。張衛健能說出"廟街各大鹹帶檔"，可以證明他出身在那些地方。)

芝士被Joey打後，芝士自言自語地說：「你老"醒"呀！出黎walk咁耐，藍燈籠白燈籠有邊瓣唔比面我？有我扲人無人扲我。」(出黎walk，即係出黎"行"，行古惑。)

火腿竟然扮芝士的表妹！你看看他的表情！(呢個笑料會唔會過火o左少少？)

火腿用迷煙迷暈Joey，說：「頭先我用個隻煙，就係我家傳的『拾積女傾煙』！」(片中大部分笑對在落在張衛健上(至少我認為係)，曾志偉部分不算太惹笑。但這個gag不俗，這種gag通常是阿叻才講得出。)
　
芝士火腿的「包出氣公司」剛成立，為了"唱行佢"，他們作了以下這首有點"林敏聰風格"的歌：
　
o作住度氣 點會好D？ 幫襯我地包出氣公司
寧願殺錯 絕不放過 要向個仇人發下火
搞邊科？ 喂，錢唔收多 話之你仇家係邊個！
社團九哥 機竇Jean Paul 羅佢隻腳冇得踢波

包出氣 眉精眼企 手腳乾淨包無手尾
包出氣 收費合理 每六秒六個四
講馬驃叔 靚仔港督 罰抄二十萬次copybook
飯店老闆 大圍爛坦 去皮碎骨將佢焗做蛋散
疊水馬伕 紅牌阿姑 學人扮Cool質佢食冬菇

男大當婚 訓覺熄燈 新馬師曾都玩成親
女人當嫁 招隻附馬 未著婚紗會心掛掛
情人眼裡 靚過西施 唔肯沖涼當佢蘇乞兒
東京有個 愛的故事 浪漫感覺會搞出事

包出氣 慳番啖氣 古靈鬼怪又一Day
包出氣 乜都敢死 手腳乾淨包無手尾
包出氣 眉精眼企 搵左我你地唔斷氣
包出氣 收費合理 每六秒六個四

愛情得意 事業順景 我地包出氣公司算幾好環境
計劃上市 開分公司 資產總值直頭天文數字

(喂！call齊d董事上黎開會傾下個市場策略)
(好呀！喂！兩杯滾水蛋)
(三件西多士，半打純紅萬，老地方老規矩，賒數)