【雜誌】Big Four歌酬三級制

日期: 2010年1月22日
來源: 壹週刊 Next Magazine

Big Four歌酬三級制

許志安、張衛健（ Dicky）、蘇永康及梁漢文（梁炳）組成的 Big Four，將於三月十一至十五日在紅館舉行五場個唱，兩度加場，係威係勢。不過，兄弟班演出，歌酬並非平均分配，而是由最貴廿萬到至 cheap五萬，極具階級的三級制。

小心吹咗落車呀骨精文！（設計對白）
搵得少梗瘦啦！（設計對白）
Big Four成員上星期坐開篷車出席個唱記者會，收得最平的梁漢文被安仔笑他瘦到得番條肋骨，改花名「骨精文」。

安康收廿萬

為了催谷個唱， Big Four成員出席記者會，上《勁歌》馬不停蹄做宣傳。相識二十年的沙煲兄弟開騷，有錢齊齊搵，但四人歌酬相距甚遠，當中以曾經七次在紅館舉行個唱的許志安，及多年來儲下多首 hit歌的蘇永康的歌酬最高，二人每晚酬勞同樣是二十萬，比張衞健（ Dicky）及梁漢文（梁炳）高一大截。

上週三，四人到電視城出席《勁歌》錄影， Dicky在台上玩到癲，用帽笠住個頭，安仔指住他大笑。

今個月初， Big Four擔任 Sammi尾場個唱嘉賓，在台上猛 sell四人在三月的演唱會， Sammi還自爆已答應做嘉賓，幫晒口。

雖然大部分時間在內地拍劇，只推出過幾張唱片，唔夠歌的 Dicky卻認為自己在內地知名度高，有能力吸納電視劇觀眾買飛入場，因此企硬收八萬蚊一場。

近年主力在大陸拍劇的 Dicky前年曾拍電影《奪標》。出唱片，已是○二年的《身體健康》及○六年的新歌加電視劇主題曲精選碟。

去年中，梁炳與美女廚神齊齊到尖沙咀酒吧巡迴「登台」，做晒小丑都係四千蚊晚。

至於被金牌大風投閒置散的梁炳，近年工作量極少，則是四人中收最少一個。○三年憑《七友》及《 501》鹹魚翻生，雖然勇奪多個樂壇大獎，可惜後勁不繼，前年成家立室後，他更不放過任何搵錢機會，大小通殺。今次兄弟開騷，梁炳只有五萬歌酬一晚，也只能逆來順受。

「有關歌酬分配，佢哋四個一早自己傾好晒。蘇康過去同安仔一齊做『安康演唱會』，就算去到美國、星馬、大陸等地做巡迴，佢哋嘅歌酬都係平均分，雖然蘇康未攞過『最受歡迎男歌手』，同安仔唔同級數，但兩兄弟夠 friend，一人一半都無所謂。梁炳近年無咩做，公司又唔理佢，之前做《美女廚房》啲酒吧騷幾千蚊都照殺，佢自己知自己事，自願做廉價勞工。」 Big Four身邊人說。

合作多次的安仔同蘇康一直希望再以兄弟班搞騷，去年向演唱會老闆力 sell，搵埋 Dicky同梁炳，又保證各人會瞓身宣傳，仲搞掂埋 Sammi等老友做嘉賓撐場，終於實現四大中佬踩紅館心願。有廿年交情做後盾，即使同工不同酬，亦無計。

許安最強

Big Four成員入行超過二十年，安仔○二年與 Sammi同奪無綫「最受歡迎男、女歌手」後發表廚房宣言，攀上事業高峰，十四年來七次在紅館舉行個唱，成功上過一線。至於梁炳多年來只搞過三次 show，雖然實戰經驗比 Dicky豐富，但衰在唔夠牙力，歌酬依然在對方之下。