【報紙】梁漢文會合 Big Four三子散心

*編按:
影片的重點在最後! 哈哈哈哈。

日期: 2010年2月6日
來源: 蘋果日報

捲入內地群毆案 梁漢文返港解畫  梁漢文會合 Big Four三子散心

梁漢文（ Edmond）日前於恩平演出酒吧騷，疑拒絕醉客合唱而遭掌摑，並引發黑幫互毆。事後 Edmond即飛曼谷會合 Big Four三子散心，至前晚（4日）他在香港機場首度露面，但對被兜巴星及被打爛車窗一概否認，更將群毆淡化成少少口角，不過他解畫時卻不停標汗，緊張表現令人費解。

左起：蘇永康、梁漢文、張衛健及許志安齊齊步出禁區，大批記者到場追訪梁漢文，其他三人變成陪襯。

梁漢文上月底於恩平酒吧登台，有傳因他拒絕與醉客合唱被掌摑，再演變成黑幫打交。事後 Edmond聲稱只是兩個男人在台上爭執，但前日本報找得事發短片，發現 Edmond當晚被多名彪形大漢包圍，但他卻於台上疾呼「我控制所有嘅場面， OK？」及「我唔鍾意俾人逼我做嘢嘅。」話口未完台上台下已大混戰， Edmond更被人拉扯致落荒而逃。

戴墨鏡帶笑出閘

其後 Edmond即飛曼谷會合許志安、張衛健和蘇永康散心，至前晚 Big Four返港。戴墨鏡的 Edmond帶笑出閘，其面上未有受傷表徵，有備而戰的他面對記者強裝鎮定，提及被掌摑一事， Edmond雖故作輕鬆，然而全程狂標汗，他說：「我去到泰國之後，有人話畀我聽有報道寫到好嚴重，我想講我完全冇俾任何人掌摑過，冇俾任何人惡意身體接觸過，呢個可以好肯定咁講。」

Edmond重提事發情況說：「成件事嘅過程係我上台時，發覺台上有兩位朋友同其他人，嗰時已經起咗音樂，所以我照唱。到唱歌中途，佢哋仲喺台上，兩個人類似有少少口角，其他人喺度勸，我唱完第一首歌後就俾工作人員拉去後台。」隨後主辦單位便通知他離開， Edmond謂：「唔係好識驚，我都唔知乜嘢事。」有傳他離場時，其座駕被人打爛車窗， Edmond也否認：「成架車係完整無缺返香港。」

此時健仔插嘴問 Edmond：「你有冇俾太太掌摑過呀？」 Edmond邊抹汗邊說：「我冇，你有冇呀？」健仔答：「我有，哈哈哈！」記者見 Edmond成頭汗，他卻說：「因為熱啫。」被問到日後登台會否更小心？ Edmond說：「都唔會嘅，一路都係咁做，會如常工作。」至於 Big Four紅館騷會否加強保安，他豪氣地說：「呢單嘢係梁漢文嘅事，唔關 Big Four事。」

(來源: 蘋果動新聞)