【報紙】張茜努力造人拉姑燉品催谷

日期: 2010年11月24日
來源: 東方日報

張茜努力造人  拉姑燉品催谷

與張衞健結婚三年一直努力造人的張茜，前日與狄波拉夫婦到中環歎茶，穿上鬆身衫的張茜明顯發胖不少，當記者問到張茜是否有喜時，拉姑亦替她着急，表示會親自燉湯水給她進補催谷。

張茜與狄波拉夫婦high Tea，三人傾得指手畫腳興致甚高。

張衞健與張茜在○七年於內地註冊結婚，揚言婚後努力造人，無奈張茜不幸經歷流產，令二人心情跌至谷底。身心受創的張茜，在老公張衞健及好友的輪流開解下，現已走出陰霾，重新積極生活，又睇中醫調理身體。

經過兩年時間，雖然多次傳出張茜再度有喜，但一直遭兩位當事人否認，早前卻有指兩公婆曾到貝沙灣睇大屋，為迎接小生命作準備。前日下午四時半，記者在中環發現張茜與拉姑及老公鬍鬚Kong，在商場內一間餐廳High Tea，席上見張茜與拉姑傾個不停，雞啄唔斷，狀甚老友。期間拉姑拿出幾個禮物盒予張茜，張茜即時表現得十分開心，不停笑笑口研究。

狄波拉陪着張茜到附近大廈整頭髮。

狄波拉與張茜十指緊扣行街，可見感情深厚。

契婆媳感情佳

醫肚後，鬍鬚Kong先行埋單走人，未幾就見拉姑拖住張茜步出，只見身穿黑色鬆身衫、灰色Leggings、腳踏4吋Platform短靴的張茜，腹部微微隆起，似是初期懷孕的婦女身形。問到拉姑為何跟張茜一起？她說：「佢係我家嫂嚟o架，張衞健係我契仔。」當追問到張茜是否有喜時，她表示：「冇呀！努力中。」身旁的拉姑即搶答：「又傳？我依家咪煲多啲湯水同燉嘢畀佢食囉。」之後二人手拖手進入附近的大廈。