來源: 蘋果日報
強國版《西遊記》劣評如潮
「Yo使乜驚！」、「型到跌渣」呢？來自劇集《西遊記》張衛健口中經典對白，大家都耳熟詳，亦係香港人成長集體回憶之一，一講起孫悟空，大家就自然諗起張衛健。特別係96年健仔主演嗰套《西遊記》，無論製作同角色方面都令人激讚，當年仲係收視之冠。隨住無綫近年製作水準每況愈下，觀眾都有明智之選，揀出有水準之作去欣賞，追捧韓劇、內地劇、美劇等等，好過一打開電視冇選擇。
內地版《西遊記》0依家喺無綫黃金時段播出，惹來眾多劣評，無論係CG（電腦繪製）﹑造型及粵語配音等都負評不絕，觀眾狂插呢部係硬膠劇，熱烈要求腰斬，因為劇情太多漏洞。0依家無綫播呢個版本嘅《西遊記》，更令視迷懷念1996年由張衞健﹑江華﹑黎耀祥及麥長青等主演嘅《西遊記》。
而當年飾演唐僧嘅江華，接受電話訪問時表示：「我冇睇過內地嗰套《西遊記》，所以真係好難作比較，可能我哋嗰套《西遊記》啱口味。」
江華飾演嘅唐僧及張衞健演嘅孫悟空，令人留下深刻印象。
近年甚少睇電視嘅江華，獲悉《西》喺黃金時段播映後，感到有啲奇怪：「8點幾播外購劇，TVB冇劇播咩？TVB本身冇製作咩？點解要買一套人哋嘅劇返嚟播？TVB係電視王國，又係大台，本來買外購劇唔出奇，但係擺喺黃金時段播？我自己覺得好奇怪，係咪真係冇戲做？冇劇集播？真係有啲匪夷所思。」
雖然劇集只出第一集，不過已經劣評如潮，問江華會否覺得此舉有「自拆招牌」？佢笑稱：「我諗每個人都需要學習，係一個好好反思嘅時候，TVB其實有好多人才，冇乜理由需要買一套外購劇，擺喺黃金時段播，可能佢哋有佢嘅理由，我哋冇辦法去識破。」
再問佢會唔會有興趣睇？佢話：「我冇乜興趣去睇，正所謂唔怕你唔識貨，最怕你貨比貨，只要一比較，就會有高低，可能香港嘅觀眾太愛我哋，所以有第二版嘅 《西遊記》，高低就咁出咗嚟，真係多謝佢哋。」
張衞健話冇睇內地版嘅《西遊記》。
身在內地嘅張衞健接受電話訪問，對於網友狂插內地版《西遊記》，佢話：「真係冇睇，唔知喎。」網友力撐當年佢扮演嘅孫悟空，健仔話：「對於自己角色，我過咗去就過咗去，好少回味，自己嘅劇從來冇睇過，《方世玉》、《鹿鼎記》、《西遊記》都冇睇，真係冇乜興趣，因為拍嘅時候已經成日對住，多謝大家仲記得我嘅孫悟空。」
健仔好奇問無綫係咪安排喺J2台播內地版？當知道係翡翠台黃金時間出街後，佢有啲愕然話：「咁真係唔知呀，冇睇過好難評語，據我理解張紀中製作一向嚴謹認真，以前佢拍金庸作品好好，佢客串做演員時我哋合作過《張三豐》，係我好尊敬一位前輩。」
沒有留言:
發佈留言