【雜誌】Big Four 眼中的杜如風杜如風是個甚麼人？

日期: 2014年10月25日
來源: 東周網 (Eastweek.com.hk) - 東周刊第582期，杜如風專欄《風言風語》

Big Four 眼中的杜如風

杜如風是個甚麼人？自己講，沒意思，還是要問問身邊的好友，才會得到最正確的答案！上星期遇到「Big 4」，吹起水來，忽發奇想，逐個問問：「喂，你哋認為我係個咩嘢人呀？」梁炳說：「爛命囉！」「我都估到你哋會咁講o架啦！」「呀，同埋你好鍾意扮嘢囉！只要有得扮嘢，你就開心o架啦！」「都係！我係costume queen吖嘛！」「我記得有一年聖誕節，你同我老婆兩個扮天使去蒲……出街蒲喎！」「係Halloween呀四哥！（梁炳另一花名）聖誕節我係扮雙刀火雞姐o架！」「呀，係呀！你啲假爆牙仲嚇到阿徐個女喊添呀！」

輪到蘇永康：「你呀？爛命囉！」（又係爛命！)「爛命倫個名我改o架！」「我記得！」「你成日都唔肯瞓囉！」「我長期失眠吖嘛！」「你根本就唔願瞓！成日掛住同Karen（梁炳老婆)煲電話粥！」「仲有呀，我做咗半世人，都未見過一個女仔可以成三日唔沖涼o架！呢啲咪爛命一條囉！」嘩！玩到爆我私隱添！「我唔沖涼係有苦衷o架！因為我天生嚴重濕疹，連皮膚醫生都提議我極度乾燥時，可以忍得一日就一日啦！」「咁你醫生有冇同你講其實衞生都好重要o架？你懶就懶呀！淨係掛住玩！」「咁玩係我職業嚟o架嘛！」「咁又係，嗱，我衷心勸各位父母，細路仔呢，係唔使管o架，愈管佢愈壞，大家睇吓倫仔，我識你十幾年，你就玩足十幾年，哼，點知又畀你玩出個天地喎！玩到變專家！淨係靠玩都可以搵到食，真係行行出狀元囉！」「嘻嘻！」

許志安的答案比較中肯，可能因為我跟他不算太熟：「我覺得你做旅遊節目做得好好，我不嬲都好鍾意睇，如果可以同你去一轉旅行就肯定好好玩嘞！」「多謝多謝！隨時奉陪！」「不過我都係覺得你好鍾意吹水、係屬『R』水吹同呃水吹嗰隻……好似阿臣（陳奕迅）咁！」「哈哈，又真係喎！」

最後輪到最無厘頭的張衞健：「你呀？鍾意搣蕉皮囉！」「咩呀？」「一隻喪蕉嘅蕉皮呀！仲要搣得好齊整喎！」小女一邊笑一邊問：「即係點呀？」「話你『喪標』囉！咁蠢o架你！」「對唔住呀Dicky！哈哈哈！」

原來……杜如風是個這樣可怕的人，也難怪小女的江湖綽號是：「可怕教主爛命倫」了！