來源: 都市日報
Weekend 追夢 梁詠琪 張衛健
一人有一個夢想，夢想可大可小，實踐亦有早有遲！
能進演藝圈的，踏入這個有無限可能的界別，都似是將夢想逐步實踐中，不過其實藝人除了演藝事業，仍然可以擁有其他夢想，誰說結婚生仔後，不能繼續追夢，只是可能形式上有所不同。
就好似張衛健與梁詠琪，因合作動畫配音，而一起接受訪問，談到兩人各自的夢想時，雖然尚未能圓夢，但卻以不同方法令夢想得以延續 。
撰文：Janice 攝影：Allen
============================================================
張衛健（Dicky）最近為動畫電影《星夢動物園》聲演「褲穿窿的富二代」，受訪時貫徹古靈精怪作風，連聲演豬媽媽的拍檔梁詠琪（Gigi）也難分其說話的真假。但一提到夢想，二人就回復正經，將希望成為社工和醫生的原因娓娓道來。
信任伴侶
Gigi去年誕下囡囡Sofia後搖身一變成為在職媽媽，但她自信能夠取得平衡，「為母則強呀嘛，為咗自己嘅仔女、家庭，真係乜都做得出。有啲嘢做阿媽之前係絕對唔會做，例如睇說明書，因為啲字好細隻呀。依家唔係啦，嵌張牀仔，刨晒先，點樣最安全呢？點砌呢？可能有啲習慣會改咗，譬如以前夜瞓，依家唔得，因為我個女6點半就起身。」提起湊女經她頓時滔滔不絕，但談到如何與另一半保持恩愛，她就推給前輩先說。
Dicky與太太張茜因工作關係經常分隔於香港和北京，不知不覺營造小別勝新婚的甜蜜，「對我哋嚟講都幾好㗎，永遠都可以保持新鮮感，大前提係大家都要信任對方，同埋有自制能力。」Gigi對此深表贊同，認為夫妻相處之道在於互相尊重、信任、包容、遷就和欣賞，她每天都在學習之中。
Dicky和張茜各有各忙，但會爭取時間見面。
梁漢文、蘇永康、張衛健及許志安曾以Big Four名義開演唱會，大受歡迎。
最怕疾病
回想初出道時，Gigi從未想過要跳舞，但為了成為聲色藝俱全的歌手，便毅然作出不同的嘗試，「跳跳吓就發覺，當初唔鍾意，係未認識到跳舞嘅樂趣，但開始咗就唔使諗人哋覺得跳得好唔好睇，因為自己Enjoy，人哋就鍾意睇。」
演藝方面更上一層樓，那現在的她有甚麼夢想？兒時她想做設計師，入行後接觸到服裝、海報跟唱片設計，總算達成半個夢想，「生咗囡囡我反而諗，如果我以前讀多啲書，做個醫生就好。」她直言最怕疾病，孩子生病令她頭痛，自己生病就擔心看不到女兒長大，「有咗家庭之後發覺健康真係好緊要，醫生真係一個好偉大嘅職業，可惜自己冇能力做到。但如果囡囡問我，做啲乜嘢可以令世界更加好，我會叫佢努力讀書，將來做醫生幫人醫病，係一個好有意義嘅工作。」不少家長希望子女完成自己未圓的夢，想不到Gigi亦一樣。
Gigi不時在網上大晒兩母女的溫馨照片。
跳舞已成為Gigi開騷的必要元素之一。
Gigi與西班牙籍老公Sergio非常恩愛。
送上關心
這邊廂Gigi認真地分享，那邊廂Dicky卻笑談「被迫」跳舞的經歷，「我唔諗住搞演唱會，係Big Four要搞，因為佢哋驚憑佢哋幾個唔係好賣到飛，係都要我參加，我咪特登跳番差少少囉！」及後Dicky終於拿出認真一面，解釋夢想做社工的原因，「我喺單親家庭長大，成長過程當中曾經好叛逆，我有權變一個好壞、好曳嘅青年，但遇到好多好嘅朋友、老師同God，最後我冇行歪咗。我好想以自己嘅經驗，講畀年青輕人聽，幫助佢哋。」
儘管夢想給人感覺若即若離，他亦積極付諸實行，多次私下到校園、監獄及戒毒所演講，「我希望喺人生下半部分，可以騰出多啲時間、Wide Angle啲。我今時今日擁有嘅Fans或者幸福，可能係好多人畀我嘅，我有咩可以畀返大家呢？除咗歡樂之外，我嘅關心可以透過乜嘢畀大家？」表面上嬉皮笑臉，實際上毋忘感恩與助人的心。
專業配音
談到兩人今次合作為動畫電影配音，Gigi直言經驗不多，是次還要配合片中主角的英語口形，「我哋要望住熒幕，又要聽住原本個英文版本，個腦要好專注。」問她有否向經驗豐富的Dicky偷師？沒想到男方搶答：「我冇咁容易畀人偷到師 ！」Gigi坦言當成拍戲讀對白，不過模仿卡通人物的亢奮和誇張也有點疲累。
為了保留原裝版本的感覺，Dicky笑言事先要靜修3個月以顧及大量事情，「認真㗎嘛，係咪？成功有原因嘅，你明唔明？哈哈！」事實上，每次配音前他均會要求電影公司提供劇本，了解故事脈絡及對白分布，「喺屋企做一啲準備先，但我又唔會做得太熟，太熟就變咗先入為主 。」本來Gigi笑着懷疑他只靜修了3小時，但聽到對方的專業分析，就不得不心悅誠服。
沒有留言:
發佈留言