【雜誌】出盡法寶抗40度高溫

日期: 2017年8月23日
來源: 東周刊，第730期「東姑818」/ tsuiwing0807 徐榮

徐榮出盡法寶抗40度高溫

四十三歲嘅徐榮，唔經唔覺入咗行十九年。初入行時多演閒角，直到〇七年，佢終憑《同事三分親》「裘俊」一角，開始為人所熟悉。後嚟，佢又喺《愛•回家》入面，飾演好爸爸「馬強」，仲出動埋細女徐心怡演佢孫女，令徐榮變做星爸，風頭一時無兩。近年，佢又改行奸角路線，繼《乘勝狙擊》做完老千後，又喺熱播嘅《超時空男臣》中，演奸到出汁嘅「卓華」，睇到東姑咬牙切齒。

日前，徐榮現身佛山，喺四十度高溫下拍新劇《大帥哥》外景，由於拍攝現場冇冷氣，所以每逢休息，佢都要開行三把大牛角風扇、一把芭蕉扇降溫，都幾誇張。

早前，東姑去咗佛山影城參觀，咁啱就撞到徐榮拍緊新劇《大帥哥》外景。當日氣溫炎炎，東姑見佢着住厚厚嘅民初軍服，又要拍槍戰，轉頭又要上山繼續拍攝，熱到大汗疊細汗。難怪見佢要出動各樣法寶降溫，好似凍水、芭蕉扇等等，以防中暑。

事後，佢向東姑表示：「呢度真係好鬼熱，露天可能成四十度，所以每人都會自備一個藥箱，入面都會有紙巾、降溫噴霧、降火嘅中藥沖劑，仲有退燒藥。去到現場覺得唔對路，我就會食定藥先。有時熱得滯，工作人員會買山水豆腐花，或者涼茶返嚟畀我哋降溫，都幾特別。」為咗養妻活兒，要喺高溫下長時間工作，睇嚟戲內戲外，徐榮都搣唔甩「馬強」嗰陣除，係位絕世好爸。

在《大帥哥》一劇中，飾演軍官的徐榮與大帥張衛健有不少對手戲，佔戲極重。