【報紙】張衛健俾躁狂父虐打

* 編按:
相關影片可以按這裡或這裡觀看。

日期: 2019年3月16日
來源: 蘋果日報 / 壹週刊 Next Plus

【一個笑匠受虐的童年】張衛健俾躁狂父虐打: 打到皮開肉綻 七、八歲已諗幾時俾佢打死

一個笑匠的幽默，是否往往在一個不愉快的童年孕育而成 ？

張衛健在中學講座，分享他如何在多次的挫折再站起來，他說人生第一個挫折是在童年時候，在躁狂爸爸的虐打之中成長。

「爸爸係一位船員，一年當中只有三個月時間喺香港。我諗人生第一個挫敗，大概出現喺我七、八歲嘅時候。而家諗番轉頭，我有理由相信當時爸爸係患咗躁狂症，甚至可以講係有啲虐待傾向，因為喺屋企裡面，每一位成員包括媽媽，與及我哋三兄弟，都會輪住俾佢打，有理由地打，無理由亦都打。

試過小時候騎住爸爸膊馬喺街行緊嘅時候，你諗下騎得爸爸膊馬，都係好細個啦！啱啱學識唱口哨，我見到一架好靚嘅車，於是我就吹口哨，然後返到屋企，佢就二話不說將我凌空拋落床，撳住我嚟打，撳到我抖唔到氣，幾乎窒息。佢話我喺街吹口哨係流氓行為，所以打我。當時我唔係好理解，如果對住個著超短裙嘅靚女吹口哨就話係流氓啫！但我對住一件死物，對住一架車吹口哨，唔係好明佢點解話我係一個流氓。不過無論如何，總之就要打。佢亦都會將我細佬打到皮開肉爛綻，我記得當年七、八歲時會諗，幾時會俾佢打死呢？幾時才捱十八歲。如果我係保持住一個消極態度，我會覺得人生無喇。

由七、八歲一直打到十八歲，打到我識得還手嘅時候，我就會還手，然後到時爸爸再打我，我就還手，我還手佢就報警，佢報警我就俾人拉。咁如果佢唔打我，打我阿媽而我又還手，到時一樣會俾人拉，我嘅人生玩完，就咁樣放棄自己。

但好多謝天主賜俾我另一種智慧，我無咁樣諗，我反而係用一種倒數心情，我會諗反正佢每年都只係返嚟三個月，而家已經過咗兩個月，淨番一個月啫，一個月當中唔係日日發作㗎嘛！兩個星期當中唔係鑊鑊我中招啩！有時候係細佬中招。

我就係保持住呢一種態度，反而當爸爸返嚟嘅時候，我每過一日開心啲，每過一日又開心啲，如果唔係咁，我就會全年都唔開心。

呢種智慧我哋常常喺一啲《心靈雞湯》都會見到，就係類似環境不能變，我哋就改變自己心境啦！呢個亦都算係一種Passion，就係我自細開始對生命喜樂嘅Passion，我希望生命得到喜樂，我就諗辦法令到自己開心。直至大概十四歲時，爸爸就選擇咗離開我哋嘅家庭，去投入另一個家庭，呢件事當然係唔開心。但坦白講，對當時嘅我嚟講，我真係開心多於唔開心。」

(來源: 影片截圖)