日期: 2012年10月7日
來源: Stars-HK 娛網
Big4拍廣告爭做最靚光頭佬 張衛健發表英俊光頭佬應有條件
BIG FOUR四位成員張衛健、許志安、蘇永康及梁漢文，早前他們為騰訊香港「WeChat微信」拍攝電視廣告，在廣告中共有3個造型，其中2個特別造型（鮮艷姣佬look及墨西哥型佬look）已曝光，而最後一個密絕光頭look亦公諸於世。不過今次最搞笑是光頭多年的張衛健卻要戴上冬菇頭假髮，而其他3位頭髮濃深的則要扮光頭佬，對於這次大變身自命光頭靚仔的健仔直踩3人核突到嘔，而3好兄弟則圍插健仔一世做光頭佬。
BIG FOUR早前為騰訊香港「WeChat微信」拍攝電視廣告，在拍攝期間健仔要戴上一個冬菇頭假髮，而安仔、蘇永康及梁漢文則戴上光頭頭套，4人更齊齊夾Band。正當等候健仔埋位時，梁漢文、蘇永康竟然大玩舞獅採蕉，由安仔打鼓助慶，笑到工作人員碌地。拍攝時他們不時有哈碌場面，梁漢文因經常大笑而令頭套爆裂，至於蘇永康打鼓因過於興奮而飛甩鼓棍，健仔的冬菇頭假髮因他跳得太勁而甩髮，整個場面令人笑爆咀。
健仔笑說：「呢個光頭look係貫徹了BIG FOUR精神，就是你跣我，我跣你。呢個造型係我提議，因為我光頭，不過到最後只有我一個有頭髮，佢哋要光頭，咁我就跣咗佢哋一鑊。」對於他們3個的光頭look，健仔直彈不堪入目，更用四個字形容，「不知所謂」、「岩岩慚慚」、「 核突到嘔」，他又勁踩的笑說：「光頭唔係咁易，要眼、耳、口、鼻都咁靚先得。安仔個鼻過大，蘇永康個鼻太扁，梁漢文個頭過尖。光頭要頭圓、眼圓、咀細鼻高充滿活力。」
安仔對於自己的光頭look初時有些看不慣，很陌生的感覺，但他自問光頭好樣過健仔，安仔笑說：「因為我光頭自然又順眼，而且光滑無比，真係靚。4位當中梁漢文最靚仔，佢本身靚仔有冇頭髮都靚仔。第2個靚咪我囉，都係謙啲好。第3個靚係蘇永康，不過睇真啲似天生殺人狂個男主角，怪怪地咁，健仔係最唔靚一個。」
蘇永康以前拍古裝片也試過光頭，他笑言光頭是一個特別形象，歐洲很多男士也是光頭，而且襯衫也很好看，他抵死的說：「小弟四十有五，頭髮仲好旺盛，健仔自己繼續享受光頭，佢呢世人都嚐試唔到gel頭吹噴髮膠，佢唔使諗呀。」梁漢文亦試過剃光頭拍戲，今次光頭look他自言好像重拾初戀感覺，至於誰最好看則見仁見智，但他笑說：「最唔靚係健仔，好唔順眼，佢應該用噃啲生髮水，佢有啲頭髮我個心先會安樂啲，我哋3個光頭都靚過佢，冇辨法。」
現在於「WeChat微信」加微信號：TheBig4 做朋友仲有搞笑短片睇。
