【報紙】媽媽未甦醒 安排神父做「病人傅油」

* 編按:
知道你的確是很堅強的，看過影片後只想跟你說，加油! ❤

日期: 2013年6月8日
來源: 蘋果日報

張媽媽未甦醒  張衞健安排神父做「病人傅油」

張衞健（Dicky）75歲媽咪余嘉碧，噚日喺尖沙咀一間酒店游水時遇溺，被送往伊利沙伯醫院深切治療部急救，情況危殆﹗Dicky細佬張衞彝（Henry）同許志安趕到醫院了解情況，而Dicky同老婆張茜噚晚漏夜由內地趕返港探媽咪。

今午有兩名疑似酒店代表嘅男子到醫院探望張母，但兩男冇答記者提問；下午時份，Dicky更新微博，為媽媽打氣加油，仲話自己同張茜會堅強﹗

張衞健話會幫媽咪祈禱。

Dicky話已安排神父做病人傅油。

張衞健胞弟Henry今日亦現身醫院。

今午四時三十五分，Dicky喺醫院向傳媒交代媽咪情況，Dicky語調平和地說：「辛苦大家﹗唔想大家等咁多個鐘，先講明講完會返入去，唔再出嚟講嘢，媽咪未醒，未知情況係點，下午五點『冷凍治療』結束，希望可盡快甦醒。」

張母﹑Dicky及Henry（資料圖片）

Dicky噚晚同老婆張茜趕抵醫院。

Dicky又話媽咪係天主教徒，而佢一家人都係天主教徒，Dicky話：「今日安排神父做『病人傅油（聖事）』，係祝福儀式，唔代表任何嘢，係任何教友過咗六十歲後，有病冇病都可每年做傅油祝福。簡單嚟講，你哋唔係教友，未必知道係乜，其實係祝福媽媽，天主幫佢度過難關，幫佢早日康復，如果唔係中間有第二啲安排，想佢離開嘅，亦想上帝帶媽咪去佢身邊，啱啱請咗神父，醫生就未見到，一陣間會再探媽咪，多謝咁多朋友打電話及傳訊息，唔使擔心，一家堅強，真心多謝大家關心。」

問Dicky係咪全晚留院陪媽咪？Dicky就話：「唔會，深切治療部探訪時間短，唔會留喺度，留喺度都冇嘢做到，家人都冇嘢幫到，只能為佢祈禱。」Dicky交代完之後就返入病房陪媽咪，冇幾耐Dicky胞弟Henry亦到達醫院。

來源: 蘋果動新聞