【報紙】安仔Sammi報喜「決定攜手共度餘生」

*  編按:
好一句又甜又酸的「睇完嘔你三碗飯」!! 哈哈~

日期: 2013年12月25日
來源: 蘋果日報

安仔Sammi報喜「決定攜手共度餘生」

現年46歲的許志安和41歲的鄭秀文（Sammi）被本報披露結婚喜訊，昨平安夜兩人返娘家開P同慶，經理人郭啟華證實安仔於Sammi生日派對上求婚成功，11月尾兩人跟雙方家人到峇里旅行慶祝，據知，安仔和Sammi在峇里舉行了夢幻婚禮，稍後才在港補辦註冊儀式，抱得美人歸的安仔興奮得向好友公告：「決定攜手共度餘生！」

許志安和鄭秀文愛情長跑22年，在情路上經歷了幾番風雨，前年兩人復合再擦愛火花，前日本報披露，Sammi的姐姐早前向好友爆料，指Sammi和安仔於11月30日在峇里結婚，昨日經理人郭啟華終代兩人公告婚訊，他說：「好開心，真係有喜訊要公佈，其實喺今年Sammi嘅生日，安仔就喺birthday party入面向Sammi求婚，卒之成功。11月尾兩個同家人去到峇里島旅行慶祝。我身為佢哋經理人，認識佢哋都超過四分一世紀，睇住佢哋經歷咗咁多嘢，卒之走埋一齊，我冇諗過Sammi會……卒之答應嘅，我同你哋一樣心情好興奮，之後呢壇嘢幾時搞，就要等佢哋容後再公佈。」

籌備夢幻婚禮

郭啟華的回應頗隱晦，未透露安仔和Sammi是否已註冊，其後他才補充說：「暫時只係求婚，佢哋喺峇里冇進行任何正式簽署註冊，香港嘅註冊都係之後嘅事。從未諗過要有婚姻嘅Sammi，需要一步一步，能走到呢一步好唔容易，大家請給予空間祝福佢哋。」據知，安仔於8月Sammi的41歲生日派對上求婚成功，之後安仔用3個月時間為Sammi籌劃夢幻婚禮，11月尾兩人跟雙方至親到峇里舉行婚禮，稍後才補搞註冊手續，明年將舉行結婚派對與親友慶祝。

好友盼快生BB

昨日平安夜傍晚6時許，人妻Sammi戴着口罩跟老公安仔離開淺水灣道寓所，直駛去Sammi位於大坑的大寶閣娘家開派對，只見車內的Sammi手捧沙律碗，安仔則面對鏡頭微笑。雖然他們決定結婚，但兩位男女主角十分低調，昨日沒開腔回應，安仔明晚將到灣仔會展出席新城勁爆頒獎禮，接受大家祝福。

Sammi和安仔終於拉埋天窗，BIG FOUR的健仔踢爆安仔肉麻報喜。

安仔和Sammi的婚訊曝光後，好友張衞健接受本報電話訪問，他說：「啱啱知求婚成功，應該未註冊。」問有冇出席Sammi生日派對見證安仔求婚？他說：「冇去到，安仔先嗰排講，都係寫段嘢通知BIG FOUR：『決定攜手共度餘生』，睇完嘔你三碗飯，肉麻嘢，我哋睇完相當興奮，以為結婚，原來求婚成功，希望佢哋快啲正式結婚，到阿康都結埋婚，BIG FOUR再冇寡佬，考慮明年搞BIG EIGHT，將阿嫂拉晒入去。」會否祝他們三年抱兩？健仔笑說：「梗係啦，我哋大家都希望快啲生BB。」問送甚麼禮物？他笑說：「冇得諗，好突然，諗唔到Sammi會答應。」

蘇永康接受電話訪問謂冇見證安仔求婚，但收到安仔訊息通知，他說：「安仔話終於老Sam首肯，要步入人生另一階段！恭喜佢，下步點做跟隨佢，去外地擺酒都陪佢，但佢兩個低調唔鍾意鋪張。我都有恭喜Sammi，佢回覆話『多謝，大家都知我哋咁多年，都應該。』之前老Sam同我講，佢話唔結婚其中一個原因，係因為我第一段婚姻失敗，畀佢好大陰影，我勸佢唔代表其他人唔成功，或者借助佢宗教，可能佢諗通咗首肯。」梁漢文則說：「聽到消息好開心，恭喜晒。」