【報紙】成班麻甩喪劈High晒

* 編按:
就係鍾意依D Big Four真性情，玩得起~

日期: 2014年11月25日
來源: 蘋果日報

【蘇永康做老襯】安仔抵得諗抬燒豬   成班麻甩喪劈High晒

恭喜恭喜！人稱「阿公」嘅蘇永康，下周二(2號)做老襯、同女友Anita，喺洲際酒店舉行婚禮喇！

早排一對準新人襯有時間，飛咗去拉斯維加斯拍婚紗照，仲彷效電影《醉爆伴郎團》(Hang Over)，請來BIG4兄弟：許志安、張衞健、梁漢文，仲有好兄弟姊妹鄧建明、歐陽德勛、蔡立等齊齊飛抵當地影靚相。

阿公話，因為未婚妻鍾意拉斯維加斯，咁啱BIG4又去巡迴演出，所以即請一眾好友完騷後留低影相。話明要玩《Hang Over》條橋，自然要玩到盡。相中阿公同一班好友一同於limousine中，狂飲香檳，非常開心，high鬼晒咁，健仔仲拎住支香檳倒落錢國偉個頭度，安仔就飲到喺車上除鞋，舉腳大笑；梁漢文就飲到面紅紅，然後扮證婚神父，一邊「吹喇叭」。阿公話:「佢哋成班友仔的確係真飲，唔係假飲。佢哋陪我哋影完Hang Over(醉爆伴郎團)，返酒店重繼續飲到天光，我同老婆之後就入沙漠影相，又包咗個摩天輪影夜景，所以一定唔可以飲醉。」

重演Hang Over場面

錢國偉俾人用香檳洗頭，對生髮有冇幫助呢？

安仔醉意甚濃

互隊

呢張相，perfect池！

講番婚禮當日，先係一朝早去酒店接新娘，中午註冊，夜晚筵開四、五十席。兄弟團名單如上，仲有劉浩龍、雷頌德、王傲山等等，姐妹團方面就出動一幫兄弟團嘅老婆同好友。阿公話:「陳奕迅同徐濠縈會做證婚人幫我哋簽紙，因為我係喺Eason婚禮上面認識我老婆，佢兩個名符其實係我哋嘅媒人。」

至於老婆大人嘅婚紗，阿公就謂:「佢就勁啦，啲衫勁過我開演唱會，會不停咁換。當日婚紗都係由曾經幫威廉皇子嘅皇妃設計婚紗ALEXANDER MCQUEEN總設計師Sarah Burton幫老婆度身設計的，另外晚上個套衫勁過人哋演唱會Ending，大家到時睇囉。」

但大家更想睇嘅可能係安仔抬燒豬呢個畫面，話說日前阿公剛做完過大禮程序，安仔親自出動幫忙抬燒豬，阿公話: 「安仔真係唔話得，過大禮當日全程幫手，佢夠大隻有體力，擔得抬得，所以我都冇叫健仔幫手了，隻豬成個人咁大，張衛健擔到扯晒蝦就唔好啦，哈哈！」

安仔做好兄弟，仲幫手抬燒豬。