【報紙】吳國敬遭Big Four輪住爆料

* 編按:
他真的有影齊Big Four呢~

(來源: 梓穎Cupid  的微博)

日期: 2015年4月6日
來源: 蘋果日報

吳國敬遭Big Four輪住爆料

噚晚係吳國敬作品展嘅尾場，喺作品展一開場嘅時候，張衞健就先喺台上講嘢，仲同一位女觀眾自拍，但係去到張衞健落台都冇畀番個電話觀眾，到咗佢第二次上台嘅時候，先至俾番個電話佢，仲話：「我喺後台用個電話影咗好多BIG FOUR嘅相。」搞到個女觀眾就好開心。

前晚張衞健就大爆阿敬嘅嘢，噚晚就輪到Big Four一齊爆佢料，首先Big Four逐個上台同佢合唱，張衞健就係第一個，喺台上佢就話阿敬：「佢係一個唔似歌手嘅歌手，唔似音樂人嘅音樂人，因為佢好鍾意賭馬，有一次影專訪相，佢坐喺欄杆，點知跌咗本馬經出嚟。」

張衞健爆佢影專訪跌馬經。

到梁漢文上台嘅時候，佢又大爆阿敬嘅事，佢話：「上一次阿敬個騒，好多朋友就喺後台準備，等佢一唱完歌，就喺後台恭喜佢，點知佢一落台就離開紅館，好耐先返嚟，紅館冇一個歌手即刻走，原來佢即刻去咗睇賽馬結果。」

而蘇永康就玩自爆話：「噚晚一齊去食飯，但係阿敬叫咗8碟都係辣嘢，所以今朝起身發現冇聲，最後用咗世上最唔健康嘅方法，我0依家全身都係類固醇。」

但係阿敬竟然話：「吓，你唔怕骨枯咩？」蘇永康就話唔怕，仲話：「就算今日我末期都要嚟。」之後吳國敬就自爆：「我哋以前好老友，有一次我去佢屋企過夜，見佢準備咗兩支牙刷，點知我用咗佢全家用嚟刷底褲嘅牙刷，仲用咗佢姑媽條毛巾抺鼻涕。」

Big Four喺同阿敬合唱前，張衞健就話識咗阿敬咁多年，今日佢最靚，我哋成日同佢講：「着靚啲啦，好似Mark Lui（雷頌德）咁，成日都咁型，唔好理佢係衣冠禽獸，但着出嚟型，今晚要講多兩句，要搞到佢喊。」但係阿敬嘅反應係：「我0依家急尿，我想去廁所。」

成班老死一齊唱《老死》。

而梁漢文就大讚阿敬認真話：「從來未見過佢咁認真做一件事，今次見佢好認真操大隻，真係對佢另眼相看。」最後佢哋一齊合唱《老死》。