來源: 蘋果日報
爆吳國敬醉酒亂咀人 張衞健: 原來嗰個係我老母
吳國敬一連兩場《敬•愛音樂30載作品展》噚晚喺紅館開鑼，Big 4四子許志安、張衞健、梁漢文、蘇永康、陳慧琳、劉浩龍、黎瑞恩同張智霖等人，為阿敬擔任頭場嘉賓，佢嘅女朋友Elaine同蘇永康嘅太太全程喺台下睇騷。同阿敬識於微時嘅張衞健，以楝篤笑嘅形式為阿敬嘅演唱會打開序幕，佢笑住話：「阿敬有先天性上下愕失調綜合症，即係漏口，所以今次嚟係負責搞吓氣氛。」佢又爆阿敬醉酒亂講嘢，佢笑住話：「佢飲大兩杯仲恐佈，唔理係人定狗，又攬又錫，仲會話I love you baby，上次蘇康結婚見佢攬個女人，我一個箭步出去，原來嗰個係我老母，仲錫埋佢塊面。」
張衞健喺台上大爆吳國敬嘅嘢。
接著一身閃爆look嘅阿敬同太極樂隊齊齊出場，佢high爆咁走勻全場，同觀眾握手兼合照，佢話：「今次係我第二次喺紅館開騷，上次係三面台，今次係四面台，希望30年後啲人翻查樂壇歷史都會搵到我。」師兄劉浩龍、黎瑞恩同陳慧琳先後同阿敬合唱，Big 4四子再陸續出場，張衞健問阿敬有否情深說話要說，阿敬臨死前想鍚佢一啖，結果鍚完張衞健塊面再鍚嘴，全場立即起哄。張衞健笑住話：「我哋由小學一年班同班識到0依家，每年食團年飯見到佢，大陸做完嘢返嚟食飯都會叫埋佢，但係咁多年都冇埋一次單！」佢又話：「不過我認定阿敬係最好朋友之一，以前我試過差幾百蚊先可以過到嗰個月，我咪問阿敬借錢，雖然佢成副成家只有1000元，但係都借咗一半身家畀我，佢真係一個值得交心嘅人，本來今次我諗住唔收錢，但係點知喺後台有人俾幾皮嘢我，原來係化妝整頭錢。」
沒有留言:
發佈留言