【報紙】Big Four三子玩串許志安紅館騷

日期: 2015年5月1日
來源: 東方日報

Big Four三子玩串許志安紅館騷

歌手許志安晚上繼續在紅館舉行《Come On 2015》演唱會第二場演出，獲梁靖琪和湯盈盈到場欣賞，嘉賓方面則找來好兄弟梁漢文（Edmond），蘇永康和張衞健（Dicky）組成Big Four，向觀眾大放笑彈。

安仔深情演唱，向觀眾大唱情歌。

Big Four 三子登場，吵熱全場氣氛。

Big Four 三子續一登場

首先登場有Edmond，和安仔合唱《美中不足》時兩人更頭貼頭，手拖手及互相掃背，基味濃烈。事後Edmond笑問安仔：「有無Feel先？」安仔答：「無，我頭先幾怕你咀埋嚟，你咩都做得出架。」

梁漢文同安仔唱到好投入，呢個動作基味甚濃。

蘇永康同安仔合唱《那誰》。

蘇永康原本唱着《那誰》在升降台出場和安仔對唱時，他手上的咪突然失靈，要工作人員替他換後聲音先可以重現，一曲過後觀眾大叫Encore，蘇永康就向安仔說：「咁返落去再唱多次。」又叫觀眾：「你哋Keep住個情緒。」獲全場掌聲。

張衞健一出場就問安仔：「你最愛光脫脫？定瘦蜢蜢呢？」立即引起全場爆笑。

到尾段就到Dicky出場，甫現身就問安仔：「你最愛光脫脫？定瘦蜢蜢呢？」立即全場爆笑，然後又指安仔說：「最憎你呢啲人着內高踭，根本係笑裏藏刀殺人於無形，我上咗嚟咁耐，點解你都唔介紹吓我嘅？」正當安仔想開口時，Dicky即打斷他：「你認為有咁嘅需要咩？邊個唔識得我？你係咪畀人灌迷湯，定減肥減到傻咗。」繼續笑爆全場。

張衞健「老奉」撐場

安仔毫無還擊力的同時，Dicky又自稱今日叫「老奉」，他說：「次次你開騷我就老奉要嚟，老奉要講好多嘢同老奉無錢收。」然後又質問安仔：「你刮埋刮埋咁多錢做咩，儲奶粉錢呀？呢個世界有人奶架。」台下即報以熱烈的歡呼聲。其後他們合唱《明星》時，二人都感觸落淚。

其後Edmond和康仔再度上台，Dicky即指着台上安仔的大型頭像布景向兩人說：「入屋叫人，入廟拜神，見到咁大個許大仙都唔拜吓。」然後三人齊向安仔的頭像躹躬，在旁的安仔一臉無奈。然後康仔又指着頭像下方笑說：「呢個湧泉穴壯陽o架，㩒咗許太今晚好唔得閒。」

玩完安仔後眾人又轉玩Dicky，因他曾笑安仔着內高踭鞋，在Edmond迫使下要Dicky除鞋檢查，結果發現他亦有用厚鞋墊，Edmond說：「嗰墊成吋厚呀。」令觀眾拍手大笑，老羞成怒的Dicky更笑笑口拿着鞋墊醒了康仔一把掌，此時安仔才出聲打圓場：「再玩我哋平時啲嘢出晒嚟架啦。」四人才收拾心情一同合唱《愛莫能助》。