【報紙】Big Four 低調做善事

日期: 2015年5月15日
來源: 東方日報

Big Four 低調做善事

歌手蘇永康（蘇康）現身電台接受劉美娟訪問，透露跟好友許志安、雷頌德、王傲山成立的慈善基金，將在本月22至24日舉行慈善義賣活動，自己會割愛捐出心愛的眼鏡作義賣：「我會搵三十幾副戴過，但又唔會再戴嘅眼鏡出嚟，然後搵老友邱子傑幫我翻新啲眼鏡，先再攞出嚟賣，善款就會捐落基金度。」他亦謂雷頌德都會捐東西出來義賣，並笑言不知安仔會否拿許太出來賣。他亦透露基金有不同慈善活動，如資助青年做飛機師的計劃。

蘇康亦透露好友韓紅有隊韓紅愛心隊，每年都搞大型慈善工作，如早前資助尼泊爾災區，而張衛健亦有參與過。隨後他自爆曾參與其他慈善工作，但笑言比他們小型很多：「因為我每年都喺內地起一間學校，前年開左間，舊年開左間畀老婆，上年結婚都公布咗，叫做「馮翠珊希望小學」，我慈善基金運作就偏向小朋友嗰方面。（有冇諗住起間Big Four 紀念學校？）我哋有講過，其實我哋一直都身體力行做慈善工作，好似前年幫過肝臟基金拍片，同埋因為梁漢文太太之前有乳癌，所以搵我地四個麻甩佬做乳癌大使，咁點得架，不過冇乜所謂啦。（男人都有乳癌架。）我都知，我間唔中都有捏捏嘅。」

講到自己做善事好像比較低調，他就謂認同韓紅所講：「做善事唔係人同人嘅事，而係人同天嘅事，向天交待就得，唔使大大聲同人講，呢啲嘢沽名釣譽嚟嘅啫，我做完陰啲陰啲講就算。」講番自己每年目標是在內地興建學校，他大呻人民幣升值：「之前起第一間都係15萬人仔。（依家呢？）上次起畀老婆嗰間都成40萬人仔。（所以就要辛苦啲做嘢？）唔緊要，都要感激經理人好有善心，令我每年有一、兩場演出，公司豪畀我，唔抽我佣，直情白做，直接將啲錢捐去我基金到，佢哋又ok。在下喺內地工作個價碼，公司每年肯捐兩場畀我已經夠起，不過比起張衛建先生，我哋呢啲蚊髀同牛髀喇，佢都費事做商演喇依家，淨係做主持都已經肥到，荷包肥但個人就瘦，真係得意。」