【網絡】我心目中既齊天大聖得張衛健一個

日期: 2016年2月18日
來源: 輔仁媒體 VJ media

我心目中既齊天大聖得張衛健一個

『今年係猴年，就算唔係猴年，改篇《西遊記》既電影電視劇都不少，但我心目中既「花果山水簾洞美猴王齊天大聖」孫悟空只得一個，就係「型到跌渣」既張衛健。』

============================================================

有兩套古裝劇，無論TVB幾時播，我應該都會睇，百看不厭個隻。一套係張衛健1996年版既《西遊記》，一套係陳浩民既《封神榜》。可以話佢地對我依家寫古代小說既取態影響都好大，內地無論斥資幾多錢，都拍唔出個種味道。

今年係猴年，就算唔係猴年，改篇《西遊記》既電影電視劇都不少，但我心目中既「花果山水簾洞美猴王齊天大聖」孫悟空只得一個，就係「型到跌渣」既張衛健。每次睇1996年個版本，都覺得好睇既野唔需要貴，有好演員有劇情就夠。最鍾意係《盤絲洞》個段，大蜘蛛精詩詩同蜈蚣精玉書條感情線，仲有三蜘蛛精恩恩單戀孫悟空，每次都要追。除左妖精搶鏡，四師徒各自性格鮮明，火花四濺，黎耀祥做既豬八戒同麥包做既沙僧入型入格，去到依家我睇《西遊記》，都覺得四師徒既形象就應該好似佢地咁。順帶一提，96年《西遊記》既主題曲同插曲 [註1] 詞曲都好正，依家聽番都琅琅上口。

為《西遊記》加入感情線呢個諗法我一向都支持，去到2002年既《齊天大聖孫悟空》，感情線發展再進一步，四師徒各自對愛情有領悟，塑造出另一番感覺，佢地唔再係只會斬妖除魔既神，仲可以係至情至聖既人。當然我依然會留意配角的感情線，紫薇仙子同哪叱就係其中之一。然後，難忘《三打白骨精》被改篇為白骨精因單戀孫悟空而被打三次的情節，因為我鍾意白骨精，覺得佢靚過紫蘭仙子，所以我想佢地係一齊多啲。張衛健完完全全成為我心目中孫悟空既最佳飾演者，而好記得個陣片頭曲段RAP到依家都識背，有小學男同學試過罰企個陣噏左句「逼巴你個隆地咚」被校長聽到，然後問佢頭先講左啲咩。在此，我又要推介大家聽返呢套劇既歌曲 [註2]，因為又係好好聽。

所以相隔20年，中間無論有幾多套新既《西遊記》，都取代唔到張衛健演既地位。而佢除左係我心中既孫悟空，亦係我心中既韋小寶，事關當年佢套《小寶與康熙》同樣經典，「涼風有信，秋月無邊，虧我思嬌既情緒好比度日如年，雖則我唔係玉樹臨風，瀟灑倜儻，但我有廣闊既胸襟，加強勁既臂彎」又係倒背如流。好喇，寫到呢度，我好似算係張衛健既歌迷，咁就推介埋首《你愛我像誰》比大家重温。

以前真係電視劇汁撈飯，但依家我真係計唔到有幾耐無煲過TVB播既劇，對上一套有留意過下既係《刀下留人》。成日上網一重温返啲舊劇舊歌，就會十分懷念以前追電視劇既日子，果然係光陰一去不復返。

（想揾返歌名就留意呢度喇:P）

[註1] 《西遊記》、《天外有天》、《把酒狂歡》、《法術烏魔多》
[註2] 《高高在下》、《信徒》、《至情至聖》