【報紙】三鞭酒賀蘇志威50歲生日

* 編按:
祝賀影片可以按這裡觀看。

(來源: 影片截圖)

日期: 2016年5月2日
來源: 蘋果日報

【「擔保鞭鞭有力」】蘇志威50歲生日 張衛健叫阿嫂俾三鞭酒佢飲下

聽日喺蘇志威50歲生日，噚日佢提早同100個歌迷開戶外Party慶祝，草蜢拍檔蔡一智帶埋老婆仔女到賀，仲齊齊同歌迷玩遊戲，而歌迷就請蘇老闆嘅父母、好友葛民輝、張衛健同容祖兒拍祝壽片送驚喜，蘇志威大女Yumi就用咗9個鐘整蛋糕，仲同妹妹Ina送吻，蘇老闆勁冧！

草蜢最近忙宣傳國語專輯《Music Walker》，變咗空中飛人。不過蘇老闆50歲生日，就決定喺香港約埋歌迷慶祝，佢收到好多生日禮物，歌迷特別請咗好多佢啲friend拍片送祝福，阿葛同張衛健最搞笑，阿葛大爆草蜢初出道時，大家同居九龍城，蘇老闆成日著住條底褲周屋走，所以一直覺得佢特別「威猛」同「硬朗」，又笑住叮囑佢：「喂！你年過半百架，著返條褲啦！啲女都大個，唔好再吊吊揈！」阿葛講到七情上面，全場爆笑。

張衛健就窒吓窒咁唱生日歌，又話：「呢首chok版生日歌特別送畀蘇老闆，祝你身體健康，年過半百，有心有力。祝你黃雨點淋都唔病，馬拉松跑極都唔冧。阿嫂，畀啲三鞭酒你老公補吓，擔保佢鞭鞭有力，生日快樂！」歌迷咁有心思，蘇老闆亦專程喺台灣帶咗10張專輯海報，同蔡一智設計嘅頭巾等禮物，送畀玩遊戲勝出嘅歌迷。

早排蘇老闆跑馬拉松暈抵，佢話當時得到一位陌生人嘅照料，又幫佢聯絡蔡一智，所以蘇老闆幾日前專登打電話問蔡一智搵番對方個聯絡，請食飯答謝人。台下歌迷聽到大拍手掌，但蔡一智就扁晒咀，原來之前蘇老闆話過請佢食鮑魚，但冇晒。蔡一智投訴：「佢唔認呢條鮑魚數，我都冇辦法！佢依家仲問我攞人哋電話，請人哋食飯，但冇提過我囉！」蘇老闆即刻安慰佢話：「唏，我唔係請佢食鮑魚吖嘛！」

生日會當然有唱生日歌同切蛋糕，蘇老闆兩位囡囡上台獻花兼咀嘴，仲有老婆劉小慧隔空Kiss，非常溫馨。之後蘇老闆感性咁話：「我真係好開心，今日嚟咗好多跟咗我好多年嘅歌迷，仲有阿智一家大細，希望每一次聚會都可以見到呢班熟悉既臉孔。好多謝歌迷搵咗好多我身邊既人拍片送畀我，祖兒、阿葛(葛民輝)和Dicky(張衛健)，就連我平時去打波嘅桌球室同車房老闆都有，最勁係搵埋我爸爸媽媽拍片。仲要多謝Yumi花咗9小時造咗個蛋糕畀我，我唔捨得食！」

報導相關影片可以按這裡觀看。

(來源: 影片截圖)