【報紙】張衛健扮傻一流

* 編按:
唔高大，唔代表唔型；揸跑車，亦唔代表型左。更何況型與否從來不是單純看外表同物質。
其實，依個世界仲有好多更有意思既野值得追求。例如，身體健康，家人幸福，朋友安康。

日期: 2016年5月17日
來源: 頭條日報 - 天天娛講

張衛健扮傻一流

張衛健唔算高大，約五呎四吋咁上下，細細粒，得得意意同個型字爭咗幾個朝代距離，係咪一世都唔可以有型？唔使咁灰豬嘅，世界上有樣嘢叫跑車，仲要係法拉利458 italia，健仔加法拉利，即刻有晒畫面。

「法拉利馬力大，一踩油就會狂飆，健仔可能怕刮花所以好小心翼翼，細細腳咁踩油門，結果泊位時搞到部車死唔斷氣咁『噓噓』聲。」娛圈人仲忍唔住影低健仔架車以證所言非虛。

有相熟娛圈人話︰「其實見過健仔兩次，兩次佢都揸住架白色法拉利，一次睇住佢掟彎撞壆；一次喺九龍塘某條街仔，見住佢泊車泊咗好耐，前面無車，後面有架大貨車，其實唔難，但佢扭嚟扭去都扭唔啱位，搞到塞住條街，前後都近十分鐘，俾司機鬧就必定㗎啦，最好笑有司機開車窗狂XYZ︰『唔識揸（法拉利）就去揸大巴啦！』，總之成條街充滿火藥味。」

娛圈人全程目擊，話好佩服健仔嘅非一般淡定，「佢一定知好多人鬧佢，但佢施施然落車，完全無理人，嗰刻啲人先知佢係張衛健。」