【報紙】《足球小將》現身撐阮兆祥

* 編按:
做乜咁認真~

日期: 2016年5月21日
來源: 蘋果日報

【又係勉勵港人嘅時候】《足球小將》現身撐阮兆祥 射呀射呀射他吧！

噚晚係阮兆祥《硬食放題棟篤笑》首場，地點係灣仔伊館，8點15分開場。嘉賓就有陳志雲、陳法拉、伍詠薇、陳敏之、張衛健、關楚耀同韓藉女友Miu Kim撐場。

去到尾聲，祥仔感觸地謂:「香港好似好多嘢都失去咗咁，好似公屋冇咗啲士多，香港人亦都好似冇咗將來，冇咗自己，冇咗自由。今晚其實我有個訊息想帶俾大家，就係硬食就係依家祥仔嘅標誌，其實硬食對自己對於生活上嘅不如意，或者失落時嘅自嘲。今次話題係硬食放題，其實係想講，你有得揀，同埋你識唔識得去揀。其實香港人心目中都係有得選擇。」 說罷即唱《前程錦繡》勉勵大家，全場一起拍和。

祥仔又同觀眾影大合照，又叫大家戴上入場嗰陣派嘅熊貓紙眼鏡，同全場一齊selfie。

感動落淚？未完，呢個時候，《足球小將》—— 唱主題曲嘅張衞健出場，同祥仔合唱「射呀射呀射他吧!」兩人又話當年，大家都係參加新秀入行，祥仔話:「當年我輸咗俾健仔，飲恨。」健仔就話:「當年都係喺呢度(灣仔伊館)舉行決賽，之前一晚嚟呢個場館瞓咗一晚，因為想同呢個場館熟啲，點知瞓完一晚真係攞到冠軍，所以話成功真係唔容易!」

健仔又憶述:「當晚決賽嘅時候，其實係得我同祥仔有跳舞，估唔到當年新增台風獎，又估唔到自己攞埋呢個獎。」兩人隨即重跳番幾十年前新秀決賽舞步，之後健仔自白:「其實我同祥仔都有一個共通點，就係大家都想喺樂壇闖一番事業，但大家都冇闖到。張衞健就去咗三廠拍劇，而佢就做咗主持，咁大家喺唔同範疇發展。」

健仔又話:「我覺得阮兆祥可以喺三年內喺紅館開到騷。」祥仔即說:「如果真係成事，我就會請張衞健做嘉賓。」又謂兩人另一共通點，就係今時今日仲喺呢行做嘢，永不放棄，仲呼籲香港人:「有夢想就要去試，香港人加油!」

突然有一隻熊貓闖入

原來係佢

「射呀射呀射他吧!」

真係功架十足

跳番幾十年前嘅Chok舞

少不了都係呢啲想當年再勉勵港人嘅環節。

咁今次對個騷俾自己幾多分? 祥仔講：「唔知噃!表現終於唔會有完美，今次好多圈中朋友睇騷，都有叫佢哋畀啲意見，等我可以改進。」咁張衛健 (Dicky) 睇好你三年內喺紅館開騷，祥仔笑言：「進軍紅磡殯儀館咩!不過好多棟篤笑嘅奇才，譬如黃子華、張達明等，都係由伊館開始，等我儲多啲觀眾先再算。」

個騷有講啲政治成份及TSA云云，祥仔強調唔係挖苦：「只不過將舊事反映出嚟，啲題材重新講一次，只係講番件事，大家先有進步，而唔係挖苦，政府就好似一間公司咁，有唔同部門，大家要通力合作先會有一個業績出嚟，如果有唔完善嘅地方，大家拎出嚟講吓、改變吓，只不過係善意嘅提點，如果唔提點，可能會行錯咗軌道。」