【報紙】舊愛張衛健返娘家 宣萱唔介意合作

* 編按:
重點係，佢應該只係會幫TVB拍埋依套呢，如果香港網劇請得郁佢都可能有合作機會啩。

日期: 2017年3月1日
來源: 蘋果日報

舊愛張衛健返娘家 宣萱唔介意合作

宣萱、鄧穎芝、林雅詩、王宗堯、仙樂都、張立基、胡渭康、許懷欣、唐貝欣和貝詩姊妹等，噚晚到尖沙嘴出席《盧根LOGAN》首映禮。

最近忙於拍攝《使徒者行2》嘅宣萱話難得有機會睇首映，而《使2》就仲有兩日戲就收工，其他演員就要拍多20日至全劇煞科。佢話：「好開心今次可以完成心願，10幾年前已經想同陳豪合作，同佢合作感覺好舒服，希望下次再有機會。」再同大台簽約拍劇咪有機會囉？宣萱即自爆：「拍杜之克(大台高層)嘅劇至會舒服啲，冇咁辛苦。」講到佢嘅前度張衛健最近都回娘家拍劇，問到會唔會有機會再同健仔合作？宣萱話唔介意再合作：「睇劇種同機會，我嗰個年代嘅演員已經唔係好拍劇，再遇到嘅機會亦好微，我會好好珍惜機會。」

張衛健之前回巢大台，宣萱話嗰個年代嘅演員已經唔係好拍劇。

同場嘅鄧穎芝就同細妹一齊嚟睇戲，講到剛被傳媒影到同個男仔做運動，佢澄清對方唔係男友：「我冇拍拖，上任男友係做健身教練，我哋分開咗3個月，不過都係拍咗3、4個月拖，因為唔啱所以唔想嘥時間，o依家要搵老公唔可以玩玩吓。」至於一齊做運動嗰位男士，佢話對方有女友，好好條件，身型好又靚仔又係健身教練，大家只想傾合作做生意。