【報紙】唔會好恨尋找他鄉的爸爸

* 編按:
相關影片可以按這裡觀看。

日期: 2018年11月22日
來源: 蘋果日報

【父親拋妻棄子】30多年冇見面 張衞健：唔會好恨尋找他鄉的爸爸

張衞健讀F.2那年，他的爸爸有外遇，拋妻棄子一走了之，自此兩父子絕斷來往，至今30多年來未見一面！

今年1月，健仔的前經理人胞弟張衞彝（Henry）倒斃上水寓所，早年兩兄弟因財反目，曾患抑鬱的Henry指哥哥拖欠其2,000萬佣金，健仔發聲明稱「指控絕對不實」，張母力撐健仔孝順兼顧家，每月給3萬元Herny作生活費和醫藥費，自此兩兄弟甚少來往，現在更陰陽相隔！
17歲未成年，健仔已經在酒廊唱歌養家，兄代父職幫媽媽養大兩個弟弟：「今年年頭Herny去世，好徬徨，唔知道點去照顧後事，記得入教堂追思彌撒嗰刻，我仲好亂，有個男仔行埋嚟同我握手，笑住講：『今晚我會為你弟弟追思彌撒讀經，放心！今晚會一切順利進行，你哋唔好太傷心！』之前我諗如果追思彌撒我好傷心，會唔會令到媽媽更加傷心？如果我好平靜，會唔會好怪呢？應該點㗎？我唔知呀，我未試過！喺我唔知嘅時候，有一個我唔識嘅人埋嚟同我握手，笑住同我講一句短短嘅說話，我第一個反應：你笑吖！但你嘅笑容令我到好溫暖！我覺得好安慰。」

健仔17歲未成年已經在酒廊唱歌養家，兄代父職幫媽媽養大兩個弟弟。

之後有日健仔反思：「我可唔可以做佢嘅角色？我同佢三唔識七，佢都嚟幫我弟弟讀經做義工，如果一個唔識嘅人舉行追思彌撒，我好似嗰個人咁，行埋去同家屬講：『你好，我係張衞健，我今晚將會為亡者讀經，放心，今晚一切會順利進行，唔好太傷心！』我覺得對方會覺得warm，同時間我都會諗，由換衫到坐車去聖堂到舉行追思彌撒到完事返屋企，大大話話三、四個鐘走唔甩，聖堂最多容納幾百人，唔係好多人受惠，後來我好快否定呢個諗法，唔好諗幾多人，依家唔係做騷，諗番德蘭修女講過一句說話：我哋做唔到好多大事，但我哋可以大愛去做好多小事，加埋就係蝴蝶效應。」所以，健仔雖然跟藍潔瑛不熟，但在她的追思彌撒上幫忙讀經。

胞弟Henry年初在寓所倒斃，健仔出席追思彌撒時好徬徨。

Henry走之前，兩兄弟關係有否修好？健仔坦言：「平靜、平淡，周不時為佢祈禱，希望佢依家喺天主身邊，可以永享主嘅聖容光輝，佢會比喺地上更幸福快樂。我冇遺憾，千絲萬縷嘅誤會，起碼喺我控制到嘅範圍，我諗唔到應該遺憾之處喺邊，因為我覺得作為一個哥哥，應該做嘅我都盡咗力，當然為人兒子、為人哥哥、為人老公、為人朋友、為人前輩，咁多年嚟我有冇做過一啲對人唔住嘅嘢？我相信任何人都有，我哋唔係聖人，但喺我人生，對人對事盡量唔好有遺憾，尤其對老人家。」

健仔侍母至孝。

問到對爸爸呢？健仔淡然說：「更加冇遺憾，冇聯絡，唔知喺邊度。其實佢喺F.2已經離開咗，可以講係冇乜感情嘞，10幾歲喎，見到可能唔認得㖭！我諗佢認得我嘅，可能睇過我啲戲，但我可能唔認得佢！有冇怨恨？真係冇，100%沒有，反而某程度上感謝。如果佢一直陪住我長大，我唔會17歲去做酒廊唱歌搵食，19歲唔會去參加新秀攞咗冠軍，我可能去咗外國讀law，因為讀law係我中學第一志願，後來冇機會讀書，要出嚟做嘢搵食。」

健仔和兩名弟弟自幼已被父親拋棄。

健仔說：「我好熱愛呢份工作，我好感恩上帝安排我係一個演員一個歌手，如果唔係爸爸離開咗，我唔會做artist。」想唔想跟父親見面？他笑說：「唔會好恨尋找他鄉的爸爸，唔會囉，唔會想搵番：『爸爸，爸爸，爸爸！』唔會，我話畀你聽會都呃你啦，我14定15歲嘅時候大家分開，我依家都幾十歲啦，但講真，如果依家突然間，我父親出現喺我面前，或者透過親戚朋友表示可唔可以照顧佢？我會！」