來源: 東方日報
張衞健眼濕濕: 可能Never Again!
張衞健相隔22年再為無綫拍劇，可惜昨日宣傳時卻暗示「掛靴」，日後未必再以廣東話拍劇，並以「少食多滋味」形容回巢：「我話一年拍一套，大家都唔會珍惜啦！」
張衞健、洪永城、曹永廉、蔡思貝及楊秀惠等，昨午齊集電視城宣傳即將推出的新劇《大帥哥》。無綫兩大高層樂易玲及曾勵珍撐場外，還有樂隊及軍車接載健仔出場，期間又舞獅點睛，可見他「分量」十足。蔡思貝向健仔狂笠高帽：「可以同佢互動、跟佢學嘢，真係賺凸咗！佢將每場戲都變成重頭戲咁拍，令我眼界大開。」不過，他在台上卻突然有所暗示：「其實由開機開始，我已經唔捨得，因為唔知幾時再會以廣東話拍劇！有可能係明年，有可能Never Again！」
大帥哥乘軍車出場，好有霸氣。
健仔講回巢講到無限感觸，好在有蔡思貝（左）與譚凱琪錫番！
望觀眾珍惜：少食多滋味
事後，健仔坦言不想不辭而別：「頭先我講到眼濕濕，因為真係唔知幾時再拍！有其他唔係娛樂圈嘅工作等我做，包括慈善及教會嘅工作。當年我拍完《西遊記》就走咗去，好似不辭而別咁，所以好想再拍番套劇嚟還畀大家。（收視有信心？）冇理呢啲嘢，拍嘅目的唔係為呢樣嘢。（唔再拍好可惜？）我話一年一部，大家都唔珍惜啦！少食多滋味！」
楊秀惠冇得提名感失望
至於楊秀惠自爆開工時遭曹永廉冷言冷語：「我今次個妝要化好耐，之前掹咗啲眉毛年幾都生唔番，最好係化好妝阿廉先返嚟。」阿廉即謂：「佢化完妝先現身，我冇咁驚！」講到《大》劇未能趕及台慶頒獎禮提名，秀惠指有少少失望：「攞過就話啫！」阿廉又寸她：「咁你去攞番啲美容獎補數囉！」搞到對方氣結而狂打他！另外，台慶頒獎禮入圍名單將於明日公布。
沒有留言:
發佈留言