【報紙】要晒紅館12個月期先夠

日期: 2019年4月12日
來源: 蘋果日報

【馮仁昭四圍超】要晒紅館12個月期先夠 張衞健傾緊棟篤笑個唱

張衞健（Dicky）前晚到中環大會堂出席「第二十八屆香港舞台劇獎」活動，佢話從未攞過「最佳男主角」，卻獲大會邀請做頒獎禮嘉賓，令佢一頭霧水，可能想呈現一位從未得過呢類獎項嘅演員撐場，突出佢仍然對演戲充滿熱誠，都係一種對他人嘅鼓勵。

張衞健講笑因自己有才華，會俾人誤會太囂張。

賣飛要似Sammi

最近有指Dicky會開棟篤笑，佢直認有人接洽搞棟篤笑或者演唱會，但仲諗緊，主要因為兩項表演都未做過。Dicky話：「弊在我有才華，可以分開做，只係驚紅館冇咁多期畀我，如果12個月畀晒我就OK。」佢又指開騷有壓力：「我字典好大隻唔掂，壓力嚟自質量同票房。」

外間讚Dicky係票房保證，佢就話羨慕鄭秀文（Sammi）：「我擔心冇人嚟睇，幾恨好似Sammi咁，大家爭住買。」佢話自己係唱歌出身又從演多年，算有舞台經驗，所以想挑戰做舞台劇或音樂劇：「棟篤笑應該係最難，因為演唱會、舞台劇同音樂劇，都有導演、劇本、對手等幫助，講求團隊精神，雖然棟篤笑都有團隊精神，但有90%來自演講者。」不過佢話會俾人誤會太囂張，要終止話題。