【報紙】與張茜愛情保鮮全靠分隔異地？

日期: 2021年1月21日 
來源: 晴報

撐林子博新節目│張衞健減產留港照顧年邁母親 與張茜愛情保鮮全靠分隔異地？

新城知訊台由林子博同范振峰擔任主持嘅節目《Bilibala開大喇叭》，今日請到張衞健（Dicky）用zoom進行訪問。張衞健喺節目中分享自己過去一年點樣喺「疫境」中度過，又同大家傾吓多年嚟保持正面嘅方法。

節目一開始，子博就多謝張衞健知道佢開咪，第一個拍心口撐佢，「唔係係呢個節目，過去年幾我太太唔舒服、工作轉變，Dicky第一時間留言畀我。Dicky把聲好溫柔，講好多打氣說話，我一畀太太聽佢就喊出嚟，Dicky我一直都好想多謝你。」

原來Dicky同子博係因為做訪問相識，交情唔算好深，但當前者睇到子博同佢太太嘅新聞，就直覺覺得「應該要做」，Dicky：「只不過係講幾句說話打氣啫，我近年都係咁，覺得應該要做嘅嘢就即刻去做，唔會等。」本身係天主教徒嘅Dicky提到佢之前曾經開解過一個陌生教友嘅囝囝，「神父畀我電話嗰個教友，佢同我講佢阿仔抑鬱，好多次想自殺，希望我開導佢鼓勵佢。同佢 (教友兒子) 傾咗好耐，有一百個左右嘅Whatsapp（對話）。」對方當時都唔係好相信佢係張衞健，「我仲特登拍片證明，後來對方媽媽都話 (傾完) 阿仔舒服咗好多。」

Dicky真係好好心地！

Dicky指自己係工作狂，疫情期間佢嘅工作量銳減，2020年完全「冇拍嘢」。其實只要佢接受隔離，仍然有唔少工作機會，不過佢選擇留喺香港，「家母年事高，不過身體好健康嘅。之前嗰度住咗十幾廿年，早排搬去新地方，老人家80幾歲，落街買嘢都唔敢，所以我留喺香港照顧媽媽。」佢形容疫情下有得有失，指自己出世到而家都未試過有咁多時間陪屋企人、做運動同做慈善工作。Dicky仲多咗時間關心朋友，呢年佢得閒就摷番自己嘅通訊錄，搵番啲「失聯」嘅老友傾偈，互相慰問令佢覺得非常溫暖。

Dicky太太張茜現時都因為照顧年邁嘅母親都長居內地，同太太被迫分隔兩地，但Dicky就話好「ok」：「結婚咁多年都唔係日黐夜黐，唔係糖黐豆型，大家經常都分開一段時間，又一齊一段時間，係奇怪啲，但對我哋嚟講又幾work，切合我哋性格，可能日對夜對會『互嘔』，小別勝新婚囉！」

值得學習！

Dicky又分享自己多年嚟保持樂觀嘅秘訣就係要有「阿Q精神」，佢提到當年初入行時只有$3,000月薪，只係交租都要$3,500，仲未計其他開銷，根本就入不敷支，佢會安慰自己，「好好㗎喇你，興趣做職業，幾生修道，有得表演有得發揮！」佢認為做人要識得開解自己，感恩以及知足。