【報紙】第一代孫悟空好富貴 張衛健變樓王

日期: 2014年5月5日
來源: 都市日報

第一代孫悟空好富貴  張衛健過億物業變樓王

最近因為膠劇《西遊記》，網民紛紛懷念第一代孫悟空張衛健（Dicky），Dicky係第一代返大陸拍劇嘅藝人，可謂豬籠入水，有報道指他手持五千萬物業之外，最近於跑馬地雲地利道買入一 個五千萬的豪宅單位，加埋總共一億元物業在手，生活無憂。

Dicky密密做其實好傷身，好在佢都抽時間調理身體。日前娛樂CIB獨家發現Dicky下午三時許單拖到山林道一間中醫館睇症，不過事後煙癮起，於醫館門口點起香煙狂扯，Dicky，吸煙危害健康呀。

門外扯煙
Dicky睇完中醫後忍不住吸口煙，煙癮都幾大。

發現記者
Dicky果然眼利，記者在車內影相都畀佢發現，厲害！

手持過億物業

無綫正在播放的外購劇《西遊記》，近日被指膠劇，令網民十分懷念02年由張衛健（Dicky）主演嘅《西遊記》。其實Dicky都好耐冇拍香港劇集，近十年都北上拍劇搵人仔，還有其組合Big4亦不時舉行巡迴演唱吸金，Dicky近年可謂豬籠入水，有報道指他在港手持的物業已超過一億港元，名副其實是圈中樓王。

做馬騮響朵
Dicky憑住1996年的《西遊記》和2002年《齊天大聖孫悟空》人氣爆燈，紅遍中港台，其後多數時間都留在大陸發展搵人仔。

為免財多身子弱，Dicky原來都注意身體。日前娛樂CIB發現他現身尖沙咀山林道一間中醫館，當日下午三時，Dicky大熱天時戴住冷帽入內睇症，約一小時後便看完診出來。此時Dicky似乎煙癮起，在中醫館門口點起煙仔，他又對門外的區瑞強音樂會海報好有興趣，一邊扯煙一邊欣賞海報，其後又拎起手機錄音，似乎玩緊微信，完事後Dicky才鬆人。
CIB覺得，Dicky想好似佢首歌《身體健康》的話，不如戒煙啦！

欣賞區瑞強
大家都係樂壇一分子，Dicky似乎對Albert Au的音樂會好有興趣，唔通想買飛支持？

玩微信
國內流行玩微信！難怪Dicky都玩。

搵銀瓣數多

要成為樓王，張衛健除了返大陸拍劇搵人仔之外，與老友蘇永康、許志安及梁漢文組成的Big4吸金力亦強，近四年Big4世界巡迴演唱已超過二十五場，即使除四份收入仍可觀。另外Dicky亦會幫電影做配音，如《反斗奇兵》、《史力加》等，絕對多才多藝。

愛妻也愛犬
07年張衛健與內地女演員張茜結婚，翌年4月Dicky向媒體證實懷孕8個月的妻子流產，不過二人一向待愛犬如己出，生活亦算美滿。