來源: dialmformovies 的ig
衰仔電影 02: 《芝士火腿》 Chez N' Ham, 柯受良, 1993年
註：本片香港原裝海報唔多夠resolution，搵咗張台灣版頂住先。
細個對小黑柯受良嘅第一印象，應該係發哥嘅《賭神2》…1994年對影迷有幾意義重大，相信我都唔使再點講。
片中佢飾演嘅悲劇人物海岸，因為遊艇爆炸慘死...陳家富仲好記得當時真係睇到好心嗡，亦都令我間接認定，（加上90年代浪子派Artist當道），小黑本人都係嗰種對人歡笑背人愁嘅人。
後來，雖然小黑英年早逝 - 先擱下時有纏繞住佢嘅負面新聞，令陳家富對佢一直停留喺一知半解嘅階段，但當後來喺畸寶睇到《咖哩辣椒》之後，我先知道佢除咗有「獨特」嘅方法處理喜劇外...佢都幾鍾意將自己塑造成嗰種...不苟言笑嘅歹角。
坦言，小黑執導嘅電影我仲未有機會睇晒，但數到印象最深刻嘅，唔係《正牌韋小寶之奉旨溝女》（...入面嘅吳雪雯，唔通睇朝偉咩？），而係《芝士火腿》…你冇聽過？唔出奇吖。
呢套戲除咗有米奇...吖Sorry...曾志偉、張衛健（你不能夠否認，佢確實係90年代演藝界嘅一大icon）、女神祖賢BB、張敏（與及仍然係做冷面殺手嘅小黑），最有睇頭嘅其實係編劇 - 郭偉鐘、阮世生、馬偉豪、Uncle Beach同周旭明 - 入面都at least有四位你有聽過啦。
故事相當簡單，曾、張二人成立「包出氣公司」，打正旗號受人錢財，代人發洩，過程極盡低俗地痞之能事 - 直至遇到劉兆銘出價一千萬，要買起永遠嘅女神祖賢BB...江湖就從此多事喇。九唔搭八地順帶一提，本片同《出埃及記》一樣...將結局印咗喺張poster上面。
或者有人會覺得《芝》片故事略欠重心（即係鬆散啦），但本片嘅特色，正正係獎門人同孫悟空喺每場之間插科打諢，口水多過茶、賤嘴無下限嘅不負責任對答 - 其實，我唔知《芝》片係咪「師承」塔倫天奴風格，但本片嘅其中一啲金句，喺唔少港產片影癡嘅心目中，絕對係永．誌．難．忘。
嘩，Miss你套Hi-Fi啲Bass勁到震穿處女膜呀喂 - 過咗咁多年睇返，Gag就擺明係娘㗎喇，但經由張衛健把口講出嚟，確實係有活化作用喎。
窗花紅棍大藍燈籠高高掛 - 明玩三合會術語，如同片初「基圍蝦」一Gag，如今要再玩，已經唔係需要勇氣咁簡單。
姐姐呀，我知道有一個字可以形容呢度（女性性器官）㗎，係...... - 張敏一場「性教育課」，少少咸多多趣，食字Gag擦邊球擦到盡，今時今日已成香港文化遺產。
陳家富
沒有留言:
發佈留言