【網絡】宣萱重提同張衛健分手

日期: 2017年10月22日
來源: 香港01

宣萱重提同張衛健分手　原來全因大男人心理！

宣萱之前在《不懂撒嬌的女人》中演活了女強人Mall姐一角，現實生活中的她同樣醉心事業，對感情事向來比較低調。日前她擔任港台節目《舊日的足跡》嘉賓接受車淑梅訪問時，就大方談及廿多年前與張衛健分手的原因，原來也跟她的事業有關。宣萱憶述這段兩年情為何會告終。

「其實時間上嘅一啲轉變，佢係一個幾傳統嘅男士，佢嘅思想唔係幾接受個女仔嘅事業好過佢。唔係唔啱嘅我覺得，咁佢係傳統思想。我吔變咗慢慢會多咗啲拗撬，咁我又覺得邊個事業好啲無咩所謂，我都有解釋其實每個人都會跌返落嚟，就算我上到去某一個位，遲早有一日都會跌返落嚟，就算我捱到廿年，都未必捱到30年，每個人嘅事業都係咁會有起有跌。咁但係可能喺男人嘅角度佢會覺得男人事業好重要嘅，如果個女人叻過佢，佢會覺得唔開心嘅，即係會引發到其他啲問題出嚟。」

宣萱在訪問中重提與舊愛張衛健分手原因。

宣萱坦言已不記得當時是誰主動提出分手：「其實就係開始會多咗好多拗撬，慢慢衍生咗好多問題。如果大家可以開心繼續梗係繼續啦，咁但係你睇到大家開始會行咗唔同嘅路，思想各方面都變咗，無得勉強。」和健仔再見亦是朋友，所以她不介意重提往事，不過兩人各有各方加上健仔長駐內地，兩人已很多年沒有見面。她也會留意對方的新聞，對方當日成家立室她也感到開心。

宣萱與張衛健拍拖兩年後分手。

而宣萱亦大讚健仔這位舊愛非常勤力，和充滿幽默感，令她十分欣賞。至於可會因為這段情而令她不敢再與圈中人拍拖，宣萱說：「分手一定有原因，我覺得每一次拍拖都係攞一啲經驗，你就會知道邊啲人啱，每一段關係都會對自己了解清楚啲嘅。啊，原來呢啲唔啱你，啊，原來咁樣先係好啲嘅。係一步一步行，唔會係佢影響到我打後話覺得圈內人唔得喇，唔會咁樣，唔關事。」熱愛工作的她又表示即使將來結婚後也會繼續工作。