來源: 蘋果日報
開門利是 阿公豪俾冇銀碼支票 姊妹要Hermès
好喇好喇，14位靚仔靚佬兄弟包括梁漢文、張衞健、草蜢、黃偉文、陳奕迅等齊齊上樓，陪阿公蘇永康接新娘子。咁當然要過姊妹團嗰關啦，阿公先要戴住「我係老婆奴」嘅面罩，蒙眼，喺眾兄弟額頭上各寫一個英文字，夾埋就係"Anita，I love you"，再畫埋心心。幸好阿公畫得好好，冇令兄弟變花面貓。
蒙眼阿公捉住班兄弟寫大字
第二關就係要佢哋做高難度yoga動作，又要阿公跪地讀愛的宣言(見另文)。至於大家都好關心嘅開門利是呢，正囉!
話說豪氣阿公俾嘅開門利是，係一張冇填銀碼嘅支票。但係眾姊妹竟然唔收，原來佢哋想要一人一個Hermès birkin鱷魚皮手袋。有姊妹仲笑阿公:「你一季嘅(買)衫(錢)都夠俾啦！」阿公即笑道:「你估我喺山西咩？帶咁多cash喺身，總之支票俾你哋，銀碼自己填啦。」但眾姊妹唔肯，話要收現金，八萬八。阿公就話:「我真係冇帶咁多cash喺身呀。」又話吉時到要接新娘，最後眾姊妹終於肯收支票，阿公順利過關抱得美人歸！
沒有留言:
發佈留言